close

छात्रवृत्ति राेकिएसँगै घटे  विद्यार्थी

छात्रवृत्ति राेकिएसँगै घटे  विद्यार्थी

Trulli
ADVERTISEMENT

दोलखा । निकेस मानन्धर धौलागिरि आवासीय बहिरा विद्यालयमा तीनवर्षे कम्प्युटर इन्जिनियरिङ ‘कोर्ष’ गर्दैछन् । उनको छैटौँ सेमेस्टरको पढाइ भर्खर सुरु भयो, तर उनी दसैँअघि नै घर फर्किएका छन्। 

सिटिइभिटीबाट मान्यता प्राप्त कम्प्युटर इन्जिनियरिङको कक्षाका लागि उनलाई सरकारले छात्रवृत्ति दिएको थियो । साे बापत उनले मासिक चार हजार रुपैँया पाउँछन् । उनीसँगै सरकारले हरेक महिना प्रतिविद्यार्थी चार हजार रुपैयाँ  वितरण गर्दै आएकाे छ । तर सरकारले साे रकम वितरण गर्न ढिलाई भएसँगै विद्यार्थी मारमा परेका छन् । 

उनका अनुसार सरकारले वितरणा गर्ने साेही रकमले काेठामा बसेर पढ्दै आएका छन् । तर सरकारले रकम वितरणमा ढिलाई गरेपछि काेठा बस्न नसकेकाे उनले गुनासाे पाेखे । 

 'काेरोना सङ्क्रमणले गर्दा उनीहरुको अन्तिम सेमेस्टर बल्ल सुरु भयो, तर छात्रवृत्ति आउन  छाड्यो,' उनले भने, सरकारले रकम नदिएपछि काेठाकाे भाडा नै तिर्न सकेका छैनाैँ ।'

उनले आफूसँगै अन्य साथीहरुकाे अवस्था पनि उस्तै रहेकाे बताए ।  

विद्यार्थीहरु घरमै बसेर पढेकाेले विद्यालयकाे कक्षाकाेठा रित्ताे भएका छन् ।   प्रधानाध्यापक रेशम श्रीषका अनुसार केही विद्यार्थी मात्रै कक्षाामा आउने गरेका छन् । 'पैसा तिरेर डेरा बस्ने, शुल्क तिर्ने काम गर्न सक्दैनन्, त्यसैले धेरैले विद्यालय छाडेका छन्', उनले भने, 'विद्यालयमा अनिवार्य उपस्थित हुन सूचना जारी गरेको छु, तर कति आउने हुन् थाहा छैन ।' विद्यालयले मङ्सिर १५ गतेभित्र सबै विद्यार्थीलाई हाजिर हुन सूचना प्रकाशित गरेको हो ।

   प्राप्त छात्रवृत्तिमा अभिभावकले थपेर सदरमुकाममा डेरामा बस्ने खाने व्यवस्था गरेका थिए । रकम आउन छाडेपछि खानबस्न समस्या भएर अभिभावकले छोराछोरी फिर्ता लगेका हुन् । कोरोना सङ्क्रमणकालमा पढाइ बन्द भएकाले कोर्ष नसकिएको श्रीषले बताए । ‘अन्तिम सेमेस्टरको पढाइ बल्ल सुरु भएको छ, तर विद्यार्थी छैनन्', उनले भने, ‘अभिभावकलाई फोन गरेर विद्यार्थी फर्काउन भनेको छु ।’ यति लामो समयसम्म पढाइ सकेका अभिभावकले अन्तिम सेमेस्टर छाडेमा बालबालिकाको भविष्य अन्योल बन्ने उनले बताए ।  । 

    यो विद्यालयमा देशभरका सुस्त श्रवणयुक्त विद्यार्थी पढ्छन् । कम्प्युटर इन्जिनियरिङ पढ्न पनि देशभरबाट नाम निकालेर आएकाहरु छन् । एउटा कक्षामा ४० जनाको कोटा छ । तीमध्ये अन्तिम सेमेस्टरका एकादुईबाहेक सबै विद्यार्थी घर गएकाले मङ्सिर १५ गतेभित्र हाजिर हुन आउन विद्यालयले सार्वजनिक सूचना जारी गरेको हो । उक्त सूचनापछि केही अभिभावकले चासो राखेर विद्यालयमा सम्पर्क गरेका छन् । तर कतिपयलाई जानकारीसमेत छैन । 

 'आर्थिक अवस्था कमजोर भएकाले छात्रवृत्तिमा पढ्न गएका थियौँ, अहिले रकम नआएपछि समस्या भएको हो’, दाङकी दुर्गा शर्मा ओलीले भने, ‘पढ्न नसकेपछि रोजगारीको खोजी गर्दैछौँ ।’ उनीहरुले पढाइ नसक्दै काममा लाग्दा लामो समयको लगानी खेर जाने अभिभावकले बताए । कतिपय विद्यार्थीले काठमाडौँका होटलमा काम खोज्दै भाै‌तारिएको बहिरा सङ्घ बागलुङका कोषाध्यक्ष यादव रेग्मीले बताए।

धौलागिरि बहिरा विद्यालयमा पाँच वर्षअघिदेखि कम्प्युटर इन्जिनियरिङको पढाइ सुरु भएको थियो । यहाँबाट तीनवर्षे ‘कोर्ष’ सकेर दुईवटा समूह छुटिसकेको छ । अहिले पनि एक सय २० विद्यार्थी कम्प्युटर इन्जिनियरिङ पढाइमा छन् । त्यसबाहेक कक्षा एक देखि १० सम्म पनि देशभरका विद्यार्थी पढ्दैछन् । आर्थिक अवस्था कमजोर भएका परिवारका सुस्त श्रवणयुक्त बालबालिका यो विद्यालयमा पढ्छन् । पछि दोभासे चाहिने भएकोले विद्यालयले कूल विद्यार्थीको १० प्रतिशत बालबालिका भने बिपन्न परिवारबाट पनि पढाइएको विद्यालय व्यवस्थापन समितिका अध्यक्ष केवी राना मगरले बताए । विद्यार्थीको भबिष्यमाथि नै खेलबाड हुने गरी रकम नआएकोप्रति उहाँले सिटिइभिटी र नेपाल सरकारका निकायमा कुरा गर्ने बताए।