चितवन–  हामी जनप्रतिनिधि निर्वाचित भएर आएसँगैं भरतपुर महानगरपालिकाले विगत चार वर्ष ६ महिनामा विकासका पूर्वाधारसँगैं अन्य क्षेत्रमा महत्वपूर्ण उपलब्धि हासिल गरेको छ । 

 

शिक्षा, स्वास्थ्य, पर्यटन, कृषि, महिला, बालबालिका, कानुन निर्माणलगायतका क्षेत्रमा महत्वपूर्ण काम भएको छ । महानगरपालिकाले स्थानीय तहमा सबैभन्दा बढी काम गर्न सफल भएको भएको छ । 

 

उपमहानगरपालिका, नगरपालिका र गाउँ विकास समिति मिलाएर बनेको भरतपुर महानगरपालिकाले जनप्रतिनिधिसँगै पूर्वाधारका क्षेत्रको विकासमा प्राथमिकता पाएको हो । चितवन क्षेत्र नं २ र ३ का वडा महानगरपालिका भित्रपर्दछ । महानगरपालिकाभित्र बन्दै गरेको सिटिहल, पुलचोकदेखि गोन्द्राङसम्मको ६ लेन सडक, महानगरको रिङ्रोड, लिङक रोड, अन्य सडक कालोपत्र, नारायणी नदी किनारको विकास, खानेपानी, नारायणी नदी तटबन्धजस्ता विकासका काम भएका छन् । 

 

शिक्षा, स्वास्थ्य, पर्यटन, कृषि, खेलकूद, यातायात, विद्युतीकरण, महिला तथा बालबालिका लगायतका क्षेत्रमा महानगरले ध्यान दिएको छ । विगत चार वर्षको अवधिमा ६१० किलोमिटर सडक कालोपत्र तथा ४५० किलोमिटर सडकमा ग्राभेल गरिएको छ । यो स्थानीय तहमा भएको सबैभन्दा बढी रहेको छ ।   

 

सङ्घीय सरकारको सहयोग तथा महानगरपालिकाको पहलमा नेपालकै सबैभन्दा लामो ८८.६ किमी महानगरीय रिङरोड ८ अर्ब २० करोडको लागत रहने गरी प्रारम्भिक वातावरणीय प्रभाव मूल्याङ्कनसहित विस्तृत परियोजना प्रतिवेदन तयार भई सघन सहरी विकासबाट १० किमि, प्रदेश सरकारबाट ८.५५ किलोमिटर, सडक विभागबाट १२ किलोमिटर र महानगरबाट १० किलोमिटर गरी जम्मा ४०.५५ किलोमिटर रिङरोड निर्माणाधीन अवस्थामा रहको छ । 

 

पुलचोकदेखि गोन्द्राङसम्म हरियाली सहितको ६ लेनको सडक फुटपाथ र सर्भिस ट्र्याक निर्माणको लागि १ अर्ब ९८ करोड ७३ लाखको लागतमा तीव्रगतिमा काम भइरहेको छ । साथै बाइपास ४ लेन सडक विस्तार एवं सतह ढल निर्माणको कार्य पनि अघि बढिरहको छ । यसैगरी हुलाकी सडकको १९ किलोमिटर विस्तार एवं स्तरोन्नति र भरतपुर –मेघौली–गोलाघाट (सहायक राजमार्ग) खण्डको ८ किलोमिटर  सडक निर्माणाधीन अवस्थामा रहेको छ । भरतपुर महानगरपालिका वडा नं ३ मा सार्वजनिक निजी साझेदारीविधि (पिपिपि) मोडलमा निर्माण हुने भरतपुर मेट्रो प्लाजाको सम्झौता भई कार्य प्रारम्भ भएको छ । 

 

राष्ट्रिय तथा अन्तर्राष्ट्रिय सभा–सम्मेलन गर्न र यसमार्फत पर्यटकीय आर्थिक गतिवधिमा बढोत्तरी ल्याउन सिटी हल बनाउने कार्य अनुरुप महानगरपालिकाको पहल एवं सहरी विकास मन्त्रालयबाट १ अर्ब ८५ करोडको लागतमा सिटी हल निर्माण कार्य द्रुतगतिमा अघि बढेको छ। केन्द्रीय बसपार्कको स्तरोन्नति, शारदानगर, जखडिमाई, दिव्यनगर, पार्वतीपुर, मेघौली र धनगढा खानेपानी आयोजना महानगरभित्रका महत्वपूर्ण आयोजना हुन । महानगरभित्र जनप्रतिनिधि आएसँगै रु चार अर्ब भन्दा बढीका खानेपानी आयोजना निर्माण सम्पन्न र निर्माणाधीन अवस्थामा रहेका छन् । 

 

भरतपुर महानगरपालिका–३ स्थित नगरवनको सानो मजुवामा करिब १ अर्ब ३५ करोडको लागत अनुमान रहेको अटोल्याण्ड निर्माणको प्रक्रिया अघि बढाइएको छ । महानगरपालिका– २१ र वडा नं २० मा लघु औद्योगिक ग्राम निर्माणको कार्य पनि अगाडि बढेको छ । नारायणी नदी किनारलाई सामुन्द्रिक तटीय मोडेलमा विकास गरी स्वदेशी तथा विदेशी पर्यटक आकर्षण गरेर आर्थिक क्रियाकलापमा वृद्धि गर्ने प्रयोजनका लागि गुरुयोजना अनुसार  २९ करोड लागतमध्ये महानगरपालिकाले  ९७ लाखको लगानीमा एक किलोमिटर वाकिङ ट्रेल निर्माण कार्यसम्पन्न गरेको छ । 

 

त्यस्तै, अन्य कामको लागि पर्यटन विभागबाट रु सात करोडको बोलपत्र भई कार्य अघि बढेको महानगरपालिकाले जनाएको छ । महानगरका पर्यटकीय गन्तव्य जोड्ने गरी ६ रात ७ दिनको टुर प्याकेज घोषणा गरिएको छ । भरतपुर अस्पतालमा ५ करोड ७५ लाखको लागतमा सुविधा सम्पन्न बिरामी कुरुवा घर, भरतपुर–१४ को शिवनगर स्वास्थ्य केन्द्रमा एक्स–रे सेवासहित १५ शय्याको अस्पताल  र शारदानगर स्वास्थ्यचौकीमा १५ शय्या क्षमताको कोभिड अस्पताल स्थापना गरी सञ्चालन गरिएकोमा सोको क्षमता विस्तार गरी नगरस्तरीय अस्पतालको रुपमा स्तरोन्नति गरिँदै छ । एक सय शय्याको आयुर्वेद अस्पताल स्थापनाका लागि प्रक्रिया अघि बढाएको छ ।

 

महानगरले ३०० शय्याको शिक्षक अस्पताल यही निर्माणका लागि पहल थालेको छ । महानगरभित्र ४० वटा स्वास्थ्य संस्था स्थापना गरी सेवा प्रवाह गरिएको छ । फोहरमैलाको दिगो व्यवस्थापनका लागि कोरियन सरकारको सहयोगमा विस्तृत अध्ययन प्रतिवेदन तयार गरिएको छ । १ अर्ब २५ करोड लागतमा यही पुस महिनाभित्र सम्झौतामार्फत वैज्ञानिक फोहर व्यवस्थापनको कार्य थालनी हुने छ। 

 

महानगरपालिकाभित्र लक्ष्मीनारायण मन्दिर, पहुँच मार्गसहितको रानीपोखरी पार्क २५ करोड ५ लाख ९८ हजारमा ठेक्का सम्झौता भई काम अगाडि बढी सम्पन्न हुने चरणामा छ । साथै खुल्ला जिमखाना, हरियाली प्रवद्र्ध्नलगायतका वातावरण संरक्षण र सहरी सौन्दर्यीकरणको काम सघन रुपमा अघि बढेको महानगरपालिकाले जनाएको छ । त्यस्तै महानगरपालिकाभित्र स्मार्ट सडक बत्ती योजना तथा १९ किलोमिटर  भूमिगत विद्युत्लाइन विस्तारको कार्य नेपाल विद्युत् प्राधिकरण तथा महानगरपालिकाको साझेदारीमा अघि बढेको छ भने ३० किलोमटिर सडकमा स्मार्ट स्ट्रिट लाइट जडानको काम सुरु भएको छ । 

 

महानगरभित्र जनप्रतिनिधि आएसँगै १३ वटा वडा कार्यालय निर्माण सम्पन्न, ६ वटा वडा कार्यालयको तला थप गरिएको छ भने बाँकी सबै वडा कार्यालयको मर्मत र स्तरोन्नति गरी सेवा प्रवाहलाई प्रभावकारी तथा प्रविधियुक्त बनाइएको छ । महानगरपलिकाले अम्ब्रेला स्ट्रिट भ्यू प्वाइन्ट निर्माण गरी आन्तरिक पर्यटन प्रवद्र्धनको काम गरिरहेको छ । गोलाघाट र चौकी डाँडामा भ्यू टावर निर्माणको काम सुरु भएको छ । देवघाटमा ९ करोड ९० लाखको लागतमा अत्याधुनिक शवदाहगृह निर्माणाधीन अवस्थामा छ । 

 

महानगरपालिकाको पहलमा धुर्मुश–सुन्तली फाउण्डेसनले यहाँ गौतमबुद्ध अन्तर्राष्ट्रिय क्रिकेट रङ्गशाला निर्माण गरेकामा हाल काम रोकिएको छ । यसलाई सम्पन्न गर्न महानगरले अग्रसरता लिएर सङ्घ र प्रदेश सरकारसँग  छलफल भइरहेको छ । महानगरकै अगुवाइमा छलफलपछि भरतपुर विमानस्थल विस्तारको प्रक्रिया अघि बढेको छ ।

 

महानगरले भरतपुर अस्पतालमा महिला ज्येष्ठ नागरिक तथा अपाङ्गता भएकालाई निःशुल्क ओपिडि टिकटको व्यवस्था, सुत्केरी हुने महिलाका लागि दूरीका आधारमा बढीमा २ हजार पाउने गरी एम्बुलेन्सखर्च प्रदान गर्दै आएको छ । कोभिड– १९ विरुद्ध करिब चार लाख डोज खोप लगाइसकिएको  छ । किसानलाई दूधमा प्रतिलिट ३ रुपैँया अनुदान दिइएको छ । महानगरभित्र एक वडा एक पशुसेवा प्राविधिकको व्यवस्था गरिएको छ । यसै अवधिमा ३५० वटा साना सिँचाइ र २१ वटा मझौला सिँचाइ आयोजना सम्पन्न गरी ४५५ बिघ क्षेत्रफललाई सिञ्चित गरिएको छ । किसानलाई ट्र्याक्टर, बीउ प्रशोधन मेसिन, धान रोप्ने मेसिन, कम्वाइन हारवेस्टर वितरण गरिएको छ । महानगरपालिकाभित्र दर्जनौं पार्क, खुल्ला जिमखाना, हरियाली प्रवद्र्धनलगायत सहरी सौन्दर्यकरणका काम भएका छन् । भवनको नक्शापास, राजश्व प्रणालीलाई अनलाइन गरिएको छ ।  

 

यातायात कार्यालयमा सेवा विस्तार गरी सवारी चालक अनुमतिपत्र दर्ता एवं नवीकरणको काम भइरहेको छ भने सवारी चालक अनुमतिपत्र प्रदान गर्ने गरी प्रक्रिया अघि बढाइएको छ । प्रमुख दाहालका अनुसार १०६ बिघा सार्वजनिक जग्गा पहिचान गरी संरक्षण गरिएको छ । स्मार्ट सिटी गुरुयोजनाको अन्तिम प्रतिवेदन प्राप्त भएको छ । शिक्षा क्षेत्रमा महानगरले अनुकरणीय अभ्यासको थालनी गरेको छ । सामुदायिक विद्यालयको शिक्षक दरबन्दी मिलान र प्रधानाध्यापक व्यवस्थापनको महत्वपूर्ण कार्य सम्पन्न भएको छ । यस अवधिमा ६ हजार विद्यार्थी बढेका छन् भने सिकाइ उपलब्धि ५ दशमलब ५३ प्रतिशतले बढेर ६२ प्रतिशत पुगेको छ । कूल साक्षरता दर ९८ दशमलब ५ प्रतिशत पुगेको छ । 

 

 भरतपुर महानगरपालिकाको १०औँं नगरसभाले  ४८ करोड ३८ लाख १० हजार ४०० पूरक बजेट विनियोजन गरेको छ । योसँगै महानगरको चालू आर्थिक वर्षका लागि रु पाँच अर्ब ३३ करोड ९९ लाख ३९ हजार ४०० बजेट पुगेको छ । महानगरको नवौं नगरसभाले ४ अर्ब ८५ करोड ६१ लाख २९ हजारको बजेट पास गरेको थियो ।  पुरक बजेटमार्फत ज्येष्ठ पत्रकार निवृत्तिभरणका लागि अक्षयकोष स्थापनार्थ नेपाल पत्रकार महासङ्घ चितवन शाखालाई  २० लाख अनुदान, भरतपुर बाल मन्दिर अटिजम विशेष विद्यालय पूर्वाधार विकासका लागि थप  १४ लाख ६८ हजार विनियोजन गरिएको जानकारी दिए ।

 

यस्तै महानगरभित्रका तीन वटा सामुदायिक क्याम्पस सप्तगण्डकी बहुमुखी क्याम्पस, मैयादेवी कन्या कलेज र शहीद स्मारक कलेजलाई  ३२ लाख अनुदान, सामुदायिक माध्यामिक विद्यालयका लेखा कर्मचारीको पारिश्रमिकमा  ७ हजारले थप गरी  २० हजार ५०० पुर्‍याइएको, विशेष कक्षाका आएको पारिश्रमिकमा मासिक १ हजार ५०० ले वृद्धि गरी  १५ हजार पुर्‍याइएको छ । महानगरको १०औँं नगरसभाले भरतपुर महानगर प्रज्ञाप्रतिष्ठान गठन ऐन २०७८ समेत पारित गरेको छ ।  महानगरपालिकाले पछिल्लो चार वर्षमा स्थानीय सरकार सञ्चालन ऐन अनुसार ११४ वटा कानुन निर्माण गरेको छ ।