फागुन ०६, २०७८
नुवाकोट–‘शिवपुरीको शान, युवा खेलाडीको पहिचान’ नारासहित शेराबगर विकास समाजले आयोजना गर्ने प्रथम शिवपुरी वडाकप फुटबल प्रतियोगिता २०७८ आउँदो १३ देखि १७ फागुनसम्म सञ्चालन हुने भएको छ ।
नुवाकोटको शिवपुरी गाउँपालिकाको सहयोगमा सञ्चालन हुने प्रतियोगिताको खेलतालिका सार्वजनिक गरिएको हो । शिवपुरी पालिकाका ८ मध्ये ७ वटा वडाले भाग लिने प्रतियोगिताको समूह ‘ए’ मा ३ वटा वडा र समूह ‘बी’ मा ४ वटा वडा रहनेछन् । लिगकम नकआउट नाइन ए साइड ढाँचामा शिवपुरी रंगशालामा प्रतियोगिता हुनेछ ।
खेल तालिकाअनुसार समूह ‘ए’ मा वडा नम्बर ४, वडा नम्बर २ र वडा नम्बर ६ रहेका छन् । समूह ‘बी’ मा वडा नम्बर ५, वडा नम्बर ३, वडा नम्बर ७ र वडा नम्बर १ रहेका छन् । वडाभित्रका खेलाडीले मात्र भाग लिनुपर्ने आयोजकको नियम भएकाले वडा नम्बर ८ ले भने खेलाडी नपुगेका कारण भाग नलिने बताएको छ । प्रतियोगिताको पहिलो खेल १३ फागुनमा वडा नम्बर ४ र वडा नम्बर २ बीच हुनेछ ।
त्यसपछि औपचारिक उद्घाटन कार्यक्रम सञ्चालन हुनेछ । सोही दिन दिउँसो साढे १२ बजे वडा नम्बर ५ र वडा नम्बर ३ बीचको खेल हुनेछ भने अर्को खेल दिउँसो ३ बजे वडा नम्बर ७ र वडा नम्बर १ बीच हुनेछ ।
प्रतियोगितामा पहिलो हुनेले १ लाख, द्वितीय हुनेले ५० हजार र तृतीय हुनेले २५ हजार रुपैयाँसहित ट्रफी प्राप्त गर्नेछन् । हरेक खेलका म्यान अफ द म्याच र प्रतियोगितामा सर्वोत्कृष्ट खेलाडी, सर्वाधिक गोलकर्ता, सर्वोत्कृष्ट डिफेन्डर, सर्वोत्कृष्ट मिड फिल्डर, सर्वोत्कृष्ट गोलकिपर, सर्वोत्कृष्ट फरवार्डलाई पनि नगद पुरस्कार दिइनेछ ।
शिवपुरीका विभिन्न वडामा रहेका खेलाडीको पहिचान, तिनको क्षमता अभिवृद्धि, खेलको माध्यमबाट शिवपुरी पालिका र यहाँ रहेको शिवपुरी रंगशालाको प्रचार–प्रसार गर्नु प्रतियोगिताको मुख्य उद्देश्य रहेको शेराबगर विकास समाजका अध्यक्ष अभियान आचार्यले बताए ।
खेलतालिका सार्वजनिक कार्यक्रममा शिवपुरी गाउँपालिकाको शिक्षा तथा खेलकुद शाखा प्रमुख रामबहादुर थापा, एन्फा रेफ्री सुकराज घले र प्रकाश सिटौला तथा सहभागी ७ वटै वडाका टिम क्याप्टेन उपस्थित थिए ।
चैत २४, २०८०
चैत १३, २०८०
चैत १९, २०८०
चैत १९, २०८०
चैत २२, २०८०
चैत १८, २०८०
