असार १९, २०७९
काठमाडौं । रुकुम पश्चिमकाे ग्रामीण भेगमा गाउँमै भिडियो एक्सरेमार्फत् गर्भ जाँच गरिएको छ ।
सानीभेरी गाउँपालिकाका चार ठाउँका एक सय ६ महिलाको गर्भ जाँच गरिएको हो ।
ग्रामीण अल्ट्रासाउन्ड कार्यक्रम अन्तर्गत सानीभेरी गाउँपालिका १ को चाइनाबगरमा १५, गाउँपालिका २ को गिठाकोटमा २२, गाउँपालिका १० को अर्मामा २६ जना र गाउँपालिका ७ को छोटेबगरमा ४६ जनाको गर्भ जाँच गरिएको जिल्ला अस्पताल सल्ले रुकुमका अस्पताल नर्सिङ निरीक्षक प्रेमा केसीले जानकारी दिइन् ।
ग्रामीण भेगका महिला सुगम ठाउँमा गर्भ जाँच गर्न जान नसक्ने भएकाले गाउँमै गएर अल्ट्रासाउन्ड मार्फत गर्भ जाँच गरिएको नर्सिङ निरीक्षक केसीले बताइन् ।
जाँचका क्रममा ११ जना महिलाको पेटको बच्चा उल्टो भेटिएकोले आवश्यक परामर्शसहित रेफर गरिएको उनले जानकारी दिइन् ।
अल्ट्रासाउन्ड मेशिन र तालिम प्राप्त जनशक्तिको अभावका कारण धेरैजसाे महिलाले भिडियो मार्फत गर्भ जाँच सेवा लिन पाएका छैनन् । गर्भ जाँच गराउन आएका धेरैजसाे महिलाले पहिलो पटक आफ्नो पेटको बच्चाको भिडियोमार्फत जाँच गरेको बताएका छन् ।
भिडियाेमार्फत् बच्चा र आफ्नोसमेत स्वास्थ्य अवस्था जान्न पाउँदा उनीहरूले खुसी व्यक्त गरेका छन् ।
बेलैमा गर्भावस्थाको समस्या पत्ता लगाउन भिडियो एक्सरे मेशिन नै बोकेर गाउँमा गएकोले मातृ तथा शिशु मृत्युदर घटाउन यस्ता कार्यक्रम प्रभावकारी देखिएकाे छ ।
सानीभेरी गाउँपालिकाकी उपाध्यक्ष कमला रोकाले हरेक टोलमा रहेका गर्भवतीहरूकाे यसरी नै गर्भ जाँच गर्ने सेवा मिलाउन आवश्यक रहेको बताइन् ।
फागुन १९, २०८०
माघ २५, २०८०
चैत १९, २०८०
चैत १९, २०८०
चैत २२, २०८०
चैत १८, २०८०
