चैत १२, २०८०
कात्तिक ०२, २०७७
बैतडी– पर्यटन प्रर्बद्धनका लागि बैतडीमा समुदायस्तरबाटै नेपालकै सबैभन्दा बढी सिंढी भएको पदमार्ग निर्माणको कामको सुरुवात भएको छ । दशरथचन्द नगरपालिका–४ स्थित प्रसिद्ध ईश्वरीगंगाधामदेखि जगन्नाथ मन्दिर जोड्ने पदमार्ग निर्माण सुरु भएको हो ।
‘एक व्यक्त एक सिंढी अभियान’ सञ्चालन गरेर ८ हजार ८ सय ४८ सिंढी निर्माण गरिने ईश्वरीगंगा धाम–जगन्नाथ मन्दिर गढी पदमार्ग निर्माण समितिका संयोजक तथा उद्योग वाणिज्य संघका अध्यक्ष नरबहादुर चन्दले जानकारी दिए ।
उक्त पदमार्गको शनिबार सुदूरपश्चिम प्रदेशका उद्योग, पर्यटन, वन तथा वातावरणमन्त्री माया भट्ट र दशरथचन्द नगरपालिकाका प्रमुख नरेन्द्रसिंह थापाले संयुक्त रुपमा शिलान्यास गरेका हुन् ।
कुल २ हजार १ सय २१ मिटर लम्बाई रहेको उक्त पदमार्ग निर्माण गर्न १० करोड रुपैंया खर्च हुने अनुमान गरिएको छ । डिपीआर नै बनाएर ३ बर्षमा सक्ने लक्ष्यका साथ निर्माणको शिलान्यास गरिएको प्रचारप्रसार समितिका संयोजक बाशु भट्टले बताए ।
विश्वको सर्वोच्च शिखरको झल्को दिने गरि ८ हजार ८ सय ४८ सिंढी निर्माण गरिन लागिएको हो । सिंढी निर्माणमा लागि सहयोग गर्न सार्वजनिक आह्वान गरिएको छ ।
एक सिंढी निर्माण गर्न ११ हजार ३७ रुपैंया लाग्ने अुनमान गरिएको छ । पदमार्गको ९ स्थानमा प्रवेशद्वार, ५ स्थानमा प्रतिक्षालय, ५ स्थानमा खानेपानीका धारा, ६० स्थानमा सौर्यबत्ती र २ स्थानमा शौचालय निर्माण गर्ने योजना छ । पर्यटक तथा दर्शनार्थीको सजिलोको लागि रातको समयमा पनि आवतजावत गर्न सहज होस् भनेर सोर्य बत्ती जडान गरिन लागिएका हुन् ।
पदमार्ग शिलान्यास कार्यक्रममा मन्त्री भट्टले आफूले व्यक्तिगत रुपमा ५ सिंढी निर्माणको लागि सहयोग गर्ने प्रतिबद्धता जनाइन् । यसका प्रदेश सरकारको तर्फबाट पदमार्ग निर्माण सहयोग हुने उनले बताइन् ।
यस्तै शिलान्यास कार्यक्रममै बोल्दै दशरथचन्द नगरपालिकाका प्रमुख थापाले नगरपालिकाका तर्फबाट सक्दो सहयोग गर्ने बताए । प्रवित्र तिर्थस्थल ईश्वरीगंगाधाम– जगन्नाथ मन्दिर जोड्ने पदमार्ग निर्माणपश्चात पर्यटन प्रवद्र्धनमा सहयोग पुग्ने दशरथचन्द माविका प्रधानाध्यापक तेजप्रकाश भट्टको विश्वास छ ।
चैत १९, २०८०
चैत १९, २०८०
चैत २२, २०८०
चैत १८, २०८०
