सिन्धुली– सिन्धुलीको कमलामाई नगरपालिकाले आज ऐतिहासिकस्थल सिन्धुलीगढीमा विजय उत्सव मनाएको छ । नेपाली फौजले अंग्रेजलाई हराएको दिनको सम्झनामा विजय उत्सव मनाइएको हो ।
आज सिन्धुलीगढीको ठुलोगढीमा कमलामाई नगरपालिकाका प्रमुख खड्गबहादुर खत्रीले झण्डोत्तोलन र नेपाली सेनाले सलामी दिने कार्यक्रम तय भएको कमलामाई नगरपालिकाले जनाएको छ ।
ओझेलमा परेको सिन्धुलीगढीको प्रचार प्रसार गर्न २०६७ सालमा नेपाल पत्रकार महासंघ सिन्धुली शाखाले सिन्धुलीगढी विजय दिवस मनाउन सुरु गरेको थियो । त्यसपछिका वर्षमा तत्कालीन जिल्ला विकास समितिको हुदै स्थानीय तहको निर्वाचनपछि कमलामाई नगरपालिकाले विजय उत्सवको आयोजना गर्दै आएको छ ।
कमलामाई नगरपालिकाका मेयर खड्गबहादुर खत्रीले आज नगरपालिकाले सार्वजनिक विदा दिएको जानकारी दिए । कोरोनाको संक्रमण फैलन सक्ने अवस्थालाई मध्यनजर गर्दै विगतका वर्षमा भव्यताका साथ उत्सव मनाउदै आएको भएपनि यस वर्ष सामान्य तरिकाले मनाइएको उनले बताए ।
२४ कात्तिक १८२४ मा नेपाली फौजले अंग्रेजलाई हराएको दिनको सम्झनामा सिन्धुलीगढीमा विजय उत्सव मनाउन थालिएको हो ।