उदयपुर– नेपाली सेनाको बम डिस्पोजल टोलीले उदयपुरको ताप्ली गाउँपालिकाको मुख्य प्रशासनिक भवनको मुलद्धारमा राखेको बम १८ घण्टापछि डिस्पोज गरेको छ ।
ताप्ली गाउँपालिकाको मुख्य प्रशासनिक भवनमा अज्ञात समुहले शक्तिशाली बम बिष्फोटन गराई कार्यालयको मुलद्धारमा राखेको बम सेनाले १८ घण्टापछि डिस्पोज गराएको हो । आईतवार बिहान १ बजे अज्ञात समुहले राखेको बम आईतवार साँझ श्री न. १८ बाहिनी अडडा भुल्के र रर्णशार्दुल गण बोक्सेबाट गएको नेपाली सेनाका बम डिस्पोजल टोलीले डिस्पोज गराएको हो ।
आईतवार बिहान १ बजेतिर शक्तिशाली बम बिष्फोटन गराउँदा उपाध्यक्ष र प्रमुख प्रशासकिय अधिकृतको कार्यकक्ष क्षतिग्रस्त भएको ताप्ली गाउँपालिका अध्यक्ष उद्धबसिंह थापाले जानकारी दिए ।
अज्ञात समुहले उदयपुरको ताप्ली गाउँपालिका– ५ रुपाटारमा रहेको केन्द्रमा बम बिष्फोटन गराएको हो । बम बिष्फोटनबाट ३ वटा कोठा क्षतिग्रस्त भएको जनाएको छ । बिष्फोटनबाट उपाध्यक्ष, प्रमुख प्रशासकिय अधिकृत, राजश्व काउन्टर, योजना शाखामा क्षति पुगेको गाउँपालिका अध्यक्ष थापाले जानकारी दिए । बिष्फोटनबाट फर्निचर, कम्प्युटर लगायतको सामान क्षति पुगेको जनाएका छन ।
जिल्ला प्रहरी कार्यालय उदयपुरका प्रहरी उपरिक्षक (एसपी) भिमबहादुर दाहालका अनुसार ताप्ली गाउँपालिकाको बन्डमा रहेको नागरिक सहायता कक्षमा बम बिष्फोटन गराएको हो । घटनाको अनुसन्धान भई रहेको छ । घटनास्थलमा कटारीबाट सशस्त्र प्रहरी बल र नेपाल प्रहरीको थप्प टोली त्यहाँ पुगेर घटना संलग्नहरुको खोजी तथा अनुसन्धान थालेको एसपी दाहालले जानकारी दिए ।
बिष्फोटन गराईएको बम शक्तिशाली सकेट बम हुन सक्ने अनुमान गरिएको छ । संघीयता कार्यान्वयमा आएसँगै स्थानीय तहको केन्द्रमा बम बिष्फोटन भएको यो घटना नेपालकै पहिलो हो ।
बम बिष्फोटनबाट क्षतिग्रस्त भवन गाउँपालिकाले भाडामा लिएको महेन्द्ररत्न माध्यामिक बिद्यालय रुपाटारको हो । गाउँपालिकाले सनिवारदेखि स्वास्थ्य क्षेत्रका लागि आवश्यक पर्ने २७ जना दरबन्दीमा परिक्षा सञ्चालन गर्दै आएको थियो ।
‘पहिलो परिक्षा सकिएकै रातमा बम बिष्फोटन भयो, अरु धेरै परिक्षा सञ्चालन हुन बाँकी थियो’ गाउँपालिका अध्यक्ष थापाले भने– ‘बम बिष्फोटनपछि रुपाटार क्षेत्र त्रसित छ ।’