चैत १२, २०८०
मंसिर १४, २०७७
बैतडी- बैतडीको पाटन नगरपालिका- ५ बगाउँका घरघरमा खानेपानीको सुविधा पुगेको छ ।
बगाउँमा ‘एक घर, एक धारा’ निर्माण भएपछि स्थानीयले वर्षौंदेखि बेहोर्दै आएको खानेपानी समस्याबाट छुटकारा पाएका हुन् ।
वर्षौंदेखि खानेपानीको समस्या झेल्दै आएका सो ठाउँका ४४ घरधुरी र एउटा विद्यालयमा पानीको पहुँच पुगेको वडा सदस्य नरेन्द्रबहादुर चन्दले जानकारी दिए । उनले भने, ‘गाउँमा खानेपानीको समस्या थियो । प्रत्येक घरमा धारा जडान गरिएका स्थानीयलाई सहज भएको छ ।’
३७ लाख ९२ हजार रुपैयाँको लागतमा गाउँमा खानेपानी पुगेको ककरी खानेपानी तथा सरसफाइ उपभोक्ता समितिका अध्यक्ष दलबहादुर चन्दले बताए । पाटन नगरपालिकाको २५ प्रतिशत, स्थानीय उपभोक्ताको २६ प्रतिशत र बाँकी ग्रामीण जलस्रोत व्यवस्थापन परियोजनाको लागतमा खानेपानी योजना सम्पन्न भएको उनले बताए ।
गाउँमा खानेपानी पुगेपछि वर्षौंदेखिको सास्ती हटेको स्थानीय जनक चन्द बताउँछन् । खानेपानीका लागि टाढाटाढा जानुपर्ने बाध्यता हटेपछि निकै सहज भएको भन्दै स्थानीय पार्वती चन्द खुसी भएकी छन् ।
खानेपानीको समस्या समाधान भएपछि गाउँबासी खुसी भएको पाटन नगरपालिका वडा- ५ का अध्यक्ष फुनिसिंह बोहरा सुनाउँछन् ।
खानेपानी तथा सरसफाई आयोजनाको उद्घाटन गर्दै नगरप्रमुख चन्दले नगरबासीको खानेपानीमा पहुँच पुर्याउन पहल गरिरहेको बताए । नगर उपप्रमुख सरस्वती कोलीले खानेपानी योजना निर्माणले महिलाहरूको घरायसी कार्यबोझमा कमी आउने विश्वास व्यक्त गरिन् ।
चैत १९, २०८०
चैत १९, २०८०
चैत २२, २०८०
चैत १८, २०८०
