बैतडी– आइतबार डोटीमा भएको जीप दुर्घटनामा बैतडीको एकै परिवारका तीन जनाको ज्यान गयो । सोमबार फेरि दार्चुलामा ट्रक दुर्घटनामा बैतडीकै दुईजनाको दुःखद निधन भएको छ ।
यसअघि गत २८ कात्तिकमा पाटन नगरपालिका–८ खोड्पेमा भएको बस दुर्घटनामा एकै वडाका तीनजनाको ज्यान गएको थियो । ९ मंसिरमा दशरथचन्द नगरपालिका–१० बुड्डामा भएको जिप दुर्घटनामा जिल्लाका पाँच जनाले ज्यान गुमाएका थिए । यी लगातारका घटनाले बैतडीबासी शोकमग्न छन् । जतापनि बैतडीकै नागरिकको सवारी दुर्घटनामा ज्यान गएको भन्दै मर्माहत भएको भन्दै सुर्नया ५ का सुरेन्द्रबहादुर महराले दुःख व्यक्त गरे ।
सोमबार दार्चुलामा ट्रक दुर्घटना हुँदा मृत्यु हुनेमा ट्रक चालक बैतडीको दोगडाकेदार गाउँपालिका–५ न्वालीका २४ वर्षीय शेरसिहं कार्की, दोगडाकेदार गाउँपालिका–६ गौकुराका जेसिवी चालक २५ वर्षीय धनसिंह भण्डारी र दार्चुलाको शैल्यशिखर नगरपालिका–८ नगतडका १७ वर्षीय चन्द्रसिंह विष्ट भएको दार्चुलाका प्रहरी प्रवक्ता तथा प्रहरी निरीक्षक पुस्करसिंह ऐरीले जानकारी दिए ।
गोकुलेश्वरबाट सदरमुकाम खलंगा तर्फ गइरहेको ना३ख ३४८५ नम्बरको ट्रक मालिकार्जुन गाउँपालिका–१ भर्ताेला भन्ने ठाउँमा दुर्घटनामा परेको हो । गएराति १० बजे दुर्घटनामा परेको ट्रक सडकबाट झण्डै १२० मिटर तल खसेको छ ।
ट्रकमा सवार तीनै जनाको मृत्यु भएकोले दुर्घटनाको कारण खुल्न सकेको छैन । दुर्घटना हुनुभन्दा ३/४ घण्टा पहिला ट्रकको इन्जिनमा समस्या आएकोले दुर्घटना भएको हुनसक्ने अनुमान छ ।
यसैबीच, डोटीमा आइतबार राति भएको जिप दुर्घटनामा बैतडीको सुर्नया गाउँपालिका-६ मूलखटालीका एकै परिवारका तीनजनाको ज्यान गएपछि पुरै गाउँ शोकमा डुबेको छ । आइतबार राती डोटीको दिपायलबाट बोगटान तर्फ जाँदै गरेको जिप दुर्घटनामा परी २८ बर्षीय मञ्जु त्रिपाठी अवस्थी, उनका ६५ बर्षीय सासुआमा डम्मरी अवस्थी र उहाँका ३ बर्षीय छोरा मिलन अवस्थीको मृत्यु भएको हो ।
एकैगाउँका तीनजनाको मृत्यु भएपछि गाउँ शोकमग्न भएको स्थानीय अम्बादत्त अवस्थीले जानकारी दिए । उनले भने ‘एकैघरका तीनजनाको मृत्यु भएको छ । गाउँ पुरै शोकमग्न भएको छ । दुर्घटनामा परी मृत्यु भएका मञ्जु डोटीको बोगटान फुड्सील गाउँपालिकामा नायब सुब्बा पदमा कार्यरत थिइन् ।
सुर्नया गाउँपालिकामा काज सरुवा गर्ने तयारी भएकै बेला दुर्घटना परी उनकाे निधन भएपछि आफ्नै गाउँमा सेवा गर्ने योजना अधुरै रह्यो । ‘शाखा अधिकृतमा नाम निकाल्छु भन्थिन् । तर दैवले मेरो घरबास उडायो । घरमा मुखमा बोल्ने मान्छे समेत बाँकी राखेन,’ मृतक मञ्जुका श्रीमान मदनराज अवस्थीले भने, ‘पापी दैवले मेरो घरपरिवार उजाड बनायो । सानैमा बुवाको मृत्यु भयो । अहिले आमा, श्रीमति र छोरा एकै दिन गुमाए ।’
बैतडीमा एक महिना नपुग्दै ११ परिवारले आफन्त गुमाएका छन् ।