close

वसन्तपुर क्षेत्रका अनधिकृत व्यापार हटाइदिन पुरातत्त्वलाई महानगरको याचना 

वसन्तपुर क्षेत्रका अनधिकृत व्यापार हटाइदिन पुरातत्त्वलाई महानगरको याचना 

Trulli
ADVERTISEMENT

समाज

 


काठमाडौं– काठमाडौं महानगरपालिकाले वसन्तपुर क्षेत्रका अनधिकृत व्यापार हटाइदिन पुरातत्त्व विभागलाई आग्रह गरेको छ । महानगरले विश्वसम्पदा क्षेत्रमा अनधिकृत व्यापार भइरहेको भन्दै ७ दिनभित्र हटाएर जानकारी दिन विभागलाई आग्रह गरेको हो । 


वसन्तपुरको वारुणयन्त्र कार्यालयबाट उत्तरतर्फको भवन र तलेजु भवानी मन्दिर नजिकैको भवनका अनधिकृत व्यापार हटाएर ७ दिनभित्र जानकारी गराउन महानगरले विभागलाई पत्रमार्फत भनेको छ । ‘वसन्तपुरसहित काठमाडौंका विश्व सम्पदा क्षेत्रको सांस्कृतिक, ऐतिहासिक र पुरातात्त्विक महत्व जोगाउनु विभागको पनि दायित्व हो’, पत्रमा भनिएको छ ।


वसन्तपुर क्षेत्रमा विभागले हेर्नुपर्ने स्थान भोगचलन गरी भवनमा पुरातात्त्विक महत्त्वविपरीत व्यापारिक प्रयोजनमा ल्याइएको जनगुनासो आएपछि महानगरले विभागलाई पत्र पठाएको हो । पत्रमा भनिएको छ, ‘तोकिएको समयमा विभागले पसल हटाउने कार्य नगरे महानगरले नै हटाउनेछ ।’ 


स्थानीय सरकार सञ्चालन ऐन, २०७४, महानगरको भवन निर्माण मापदण्ड, २०७५ र प्राचीन स्मारक ऐन, २०१३ समेतको कानुनी व्यवस्थाबमोजिम वसन्तपुर क्षेत्रका प्राचीन स्थल संरक्षण, मर्मत र जीर्णोद्धारका साथै उक्त क्षेत्रमा सञ्चालित अनधिकृत व्यापार–व्यवसाय हटाउनु कार्यालयको प्राथमिक योजनाभित्र पर्ने महानगरको भनाइ छ ।


१४ फागुनमा महानगरको सम्पदा तथा पर्यटन विभागले पत्र पठाएको हो । विश्व सम्पदा सूचीमा सूचीकृत हनुमानढोका क्षेत्रका ऐतिहासिक सम्पदाको पुनर्निर्माण कार्यले पनि तीव्रता पाएको छ ।

अहिलेसम्म यस क्षेत्रका २७ सम्पदा पुनर्निर्माण सम्पन्न भइसकेको छ । ०७२ को भूकम्पले क्षतिग्रस्त ५८ सम्पदामध्ये ११ वटाको पुनर्निर्माण भइरहेको हनुमानढोका दरबार हेरचाह अड्डाले जनाएको छ ।


यहाँ विश्व सम्पदा क्षेत्रमा सूचीकृत रहेका ७० सम्पदा छन्, जसमध्ये १२ वटामा भूकम्पले क्षति पु¥याएको थिएन । अड्डाका कार्यालय प्रमुख सन्दीप खनालका अनुसार अहिले बनिरहेका सम्पदाको काम चलिरहेकाले निर्माण सम्पन्न गरेपछि मात्रै २० वटा सम्पदाको काम सुरु हुनेछ ।


हनुमानढोका दरबार क्षेत्रको नौतले दरबार चीन सरकारको अनुदान सहयोगमा पुनर्निर्माण भइरहेको छ । दरबारको ६० प्रतिशत काम सकिएको छ । कोरोना महामारीका कारण नौतले दरबार पुनर्निर्माणमा केही ढिलाइ भएको हो ।


नौतले दरबार सन् २०२२ सम्ममा सक्ने गरी सम्झौता भएको अड्डाले जनाएको छ । यसअघि गद्दी बैठक अमेरिकाको सहयोगमा पुनर्निर्माण सम्पन्न भइसकेको छ ।