चैत १२, २०८०
चैत ०३, २०७७
सुनसरी/इटहरी- मोरङको रानी-विराटनगर-इटहरी-धरान ६ लेनको व्यापारिक सडक विस्तारअन्तर्गत धरानको मुख्य हाइवेका करिब १ हजार घर भत्किने भएका छन् ।
६ लेन सडक विस्तारका लागि धरानको मुख्य हाइवे हुँदै जिरो प्वाइन्टसम्म १ हजार घर भत्किन सक्ने ६ लेन सडक विस्तार आयोजना इटहरीले जनाएको हो ।
धरानको तीनकुनेबाट ब्रिटिस क्याम्पसम्म ५ किलोमिटर हाइवेलाई ६ लेन बनाउँदा १ हजार घरमा आधाउधि क्षति पुग्ने ६ लेन सडक आयोजना प्रमुख बद्रीप्रसाद शर्माले बताए ।
‘हाइवेमा पर्ने घर भत्काएपछि घरधनीलाई क्षतिपूर्ति दिइनेछ । तर, जग्गाको क्षतिपूर्ती भने पाउँदैनन्’, प्रमुख शर्माले भने ।
धरान उपमहागरले भने हाइवे सडक विस्तारमा ध्यान दिएको छैन । उपमहानगरले ७२ फुट मात्र क्लियर गर्न चाहेको छ ।
धरानको मुख्य बजार भत्कने भन्दै उपमहानगरले चासो नदिँदा ६ लेन सडक विस्तारको काममा ढिलाइ भइरहेको उपमहानगरका एक कर्मचारीले बताए ।
उनले भने, ‘मेयर साबले ६ लेन सडक निमार्णमा चासो देखाउनुभएको छैन । उपमहानगरले हाइवेका घर नभत्काई सेउती करिडोर र सर्दु करिडोर क्षेत्रबाट लौजाने प्रस्ताव ल्याएको थियो । तर, सडकले हाइवे छाडेर अन्यत्रबाट सडक लौजान नसक्ने बताउँदै आएको छ ।’
सडक विस्तार आयोजनाका प्रमुख शर्माले अन्य करिडोरबाट जाँदा ५ किलोमिटर बाटो बनाउनुपर्ने ठाउँमा १० किलोमिटर बनाउनुपर्ने बताए । सडक घुमाएरै लौजाँदा पनि घरमा क्षति पुग्ने उनको भनाइ छ ।
‘उपमहानगरले निर्णय गरेर सेउती करिडोरबाट सडक लौजान भनेको छ । आयोजनाले घरको क्षतिपूर्ति दिन सक्दैन’, प्रमुख शर्माले भने ।
सुन्दर सहर धरानमा ६ लेनको सडक बनाउनैपर्ने आयोजना प्रमुख शर्माको तर्क छ । बस्ती भएको क्षेत्रमा ठूलो बाटो बनाउनु आवश्यक रहेको उनले बताए ।
पार्किङसँगै अन्य यात्रुुका लागिसमेत धरानको मुख्य बजारमा ६ लेन सडक नै बनाइने उनले जानकारी दिए ।
सडक विस्तार सुरु भएको ६ वर्ष भए पनि पूर्णता पाउन सकेको छैन । धरान क्षेत्रमा सडक विस्तारको कुरा नमिल्दा ठेक्का लाग्न सकेको छैन । सडक विस्तारको काम आर्थिक वर्ष २०६९/७० देखि सुरु भएको हो ।
शर्माका अनुसार रानीदेखि धरानसम्म ४९ किलोमिटर लामो सो सडकमध्ये पटक-पटक गरी ३४ किलोमिटरको ठेक्का लागिसकेको छ । जम्मा १० अर्ब रुपैयाँको यो योजनामा ३४ किलोमिटर बाटो ७ अर्ब रुपैयाँमा ठेक्का लागेको हो ।
ठेक्का लागेजति सडकलाई १४ टुक्रा बनाएर विभिन्न निर्माण कम्पनीले काम गरिरहेका छन् ।
इटहरी-धरान सडक विस्तारका लागि रुख काटेर विस्तारको काम भइरहेको छ । चारकोशे जंगल क्षेत्रमा पर्ने सडकका दुवै किनाराका रुख काटेर सडक विस्तार भइरहेको आयोजनाले जनाएको छ ।
हाइवेमा पर्ने करिब १ हजार रुख कटान गरिसकिएको छ । तरहरादेखि धरानसम्म चारकोशे झाडीको ९ किलोमिटर सडकको काम सुरु भएको हो ।
तरहरादेखि धरानसम्म ४ लेनको मात्र हुने आयोजनाले जनाएको छ । सडकको दायाँबायाँ ११.५ र ११.५ मिटर चौडाइमा सडक विस्तार हुनेछ ।
आयोजना प्रमुख शर्माका अनुसार जंगलमा ड्रेन र फुटपाथ बनाउन नपर्ने हुँदा सोही मापदण्डमा सडक विस्तार हुने भएको हो ।
चैत १९, २०८०
चैत १९, २०८०
चैत २२, २०८०
चैत १८, २०८०
