उदयपुर– जलस्रोत तथा सिँचाइ विकास डिभिजन कार्यालय उदयपुरले लक्षित वर्गको प्राथमिकताभन्दा बाहिर गएर काम गरेपछि बजेट दुरुपयोगको आरोप लागेको छ ।
बरुवाखोला मुहान भई असारी–भुसुने सिँचाइ योजना मर्मतको नाममा कार्यालयले लक्षित वर्गको प्राथमिकताभन्दा बाहिर काम गरेर बजेट दुरुपयोग गरेको आरोप लागेको हो ।
योजनाको माथिल्लो भेगमा मर्मत आवश्यक हुँदाहुँदै नहरको पानी नपुग्ने पुछार भागमा आरसिसी ढलानसहितको काम भइरहेको छ ।
भुसुने–असारी जल उपभोक्ता संस्थाका अध्यक्ष प्रयागराज रेग्मीका अनुसार मर्मत कार्य अति आवश्यक ठाउँमा गर्न आग्रह गर्दा कार्यालय प्रमुख देवनन्दन मण्डलले अस्वीकार गर्दै पानी नै नपुग्ने ठाउँमा काम गराएका छन् । ४ लाख ८२ हजार ४ सय ९० रुपैयाँ लागत स्टिमेटको मर्मत कार्य कोटेसनमार्फत एउटा कन्स्ट्रक्सनलाई ४ लाख ८१ हजार ९ सय ७१ रुपैयाँमा दिइएको छ ।
५ लाख रुपैयाँभन्दा कम बजेटको योजना कार्यालय प्रमुखले कोटेसनमार्फत काम गराउन सक्ने प्रावधान रहे पनि त्यो काम लक्षित वर्गको हितमा हुन जरुरी छ ।
स्थानीय कृषक सिंहबहादुर राईका अनुसार नहरको माथिल्लो विभिन्न भागमा कमजोर ठाउँ रहेको र ती ठाउँमा माटो र बोरा राखेर पानी ल्याउने काम भइरहेको छ । तर, सरकारी बजेट भने अनावश्यक ठाउँमा लगाएर दुरुपयोग भएको छ ।
असारीको पूर्व–पश्चिम लोकमार्गको कालोपत्रे सडकमुनि आरसिसी ढनालसहितको काम भइरहेको हो । कार्यालय प्रमुखको मनोमानीबाट काम हुँदा लक्षित वर्गको ठूलो हिस्सा सरकारी बजेटबाट वञ्चित भएको संस्थाका सचिव प्रदीपकुमार अधिकारीले जानकारी दिए ।
‘सरकारी बजेट १ रुपैयाँ भए पनि लक्षित क्षेत्रका नागरिकको हकाधिकार लाग्ने गर्छ । तर, त्यहाँ के–कति बजेटमा कसले काम गर्दै छ भन्नेसमेत पत्तो पाउन सकिएन’, अधिकारीले भने ।
भुसुने–असारी जल उपभोक्ता संस्था नवीकरण नभएका कारण कार्यालयले कोटेसनमार्फत काम गराएको जनाएको छ । संस्था नवीकरण नभए पनि योजनाको तल्लो, मध्य र माथिल्लो सबै भेगका उपभोक्तालाई समेटेर काम नगराउँदा विवाद भएको हो ।
उपभोक्ताको संस्था नवीकरण नरहेको र तल्लो भेगीय उपभोक्ताबाट माग आएकाले कोटेसनमार्फत काम गरिएको कार्यालय प्रमुख देवनन्दन मण्डलले बताए ।
हाल तल्लो भेगीय उपभोक्ताको हितमा काम गरिएको र आगामी दिनमा माथिल्लो भेगका समस्यालाई हेरिने उनको दाबी छ । ‘आवश्यकता हेरेरै काम गरिएकाले सरकारी बजेटको दुरुपयोग भयो भन्न मिल्दैन’, उनले भने ।