पाल्पा– कोरोना महामारीका कारण कृषकको उत्पादन खेतबारीमै सड्ने अवस्था आएपछि पाल्पामा कृषि एम्बुलेन्स सञ्चालनमा ल्याइएको छ । खेतबारीमै तरकारी कुहिने अवस्था बनेपछि सहरका उपभोक्ताको घरसम्म एम्बुलेन्समार्फत तरकारी ल्याउन थालिएको हो । 

कृषि एम्बुलेन्सबाट तानसेन पालिकाभित्रका उपभोक्ता लाभाविन्त भएका छन् । कृषि सहकारी संस्थाको पहलमा तानसेन नगरपालिका र साझेदार निकाय मिलेर कृषि एम्बुलेन्स सञ्चालन गरिएको हो । कृषकसँग खरिद गरेको मूल्यमा ढुवानी जोडेर उपभोक्तालाई तरकारी बिक्री गर्न थालिएको छ ।

तौलअनुसारका प्याकेजिङ गरी सुरक्षा मापदण्ड अपनाएर सहरमा तरकारी बिक्री गरिँदै आएको छ । कोरोना कहरले ताजा तरकारी सस्तो मूल्यमा पाएपछि उपभोक्ता झनै खुसी छन् । स्वास्थ्य मापदण्ड अपनाएर तरकारी खरिद गरेको तानसेन नगरपालिकाका चन्द्रबहादुर थापाले बताए ।

गत वर्ष पनि कोरोना कहरका बेलामा पालिकाहरूले कृषि एम्बुलेन्स सञ्चालन गरेका थिए । कृषक सहकारीले तरकारी बारीमै कुहिन थालेपछि यो वर्ष पनि कृषि एम्बुलेन्स सञ्चालन गरेका हुन् । घरगाउँमा उत्पादित सिमी, काँक्रो, खुर्सानी, कटहर र गोलभेडा सहरमा बिक्री भइरहेको हो ।

३ दिने अवधिमा ६ हजार किलो तरकारी बिक्री भएको छ । कृषि एम्बुलेन्स सेवा सुरु भएपछि कृषकलाई राहत मिलेको साझेदार संस्थाका कार्यक्रम अधिकृत विष्णु पाण्डेले बताए । कृषि एम्बुलेन्स सञ्चालनले बन्दाबन्दीका बेला कृषक र उपभोक्ता दुवैलाई फाइदा पुगेको उनको दाबी छ ।