पारि तिब्बततिर घनघोर वर्षा : तामाकोसी आउने पानीको उकास खुलाउँदै चिनियाँ नागरिक 


  • change font
  • change font
  • change font

दोलखा– चीनको स्वशासित क्षेत्र तिब्बतमा भारी वर्षापछि आएको पहिरोका कारण थुनिएको नदीलाई चिनियाँ नागरिकले चारैतिरबाट पानी कटाउन थालेका छन्।एकै पटक पोखरी बनेको नदी फुटेसँगै नेपालसम्म क्षति पु¥याउने देखिएपछि उनीहरूले पानी तर्काउन लागेका हुन् ।

 

दोलखाको बिगु गाउँपालिका वडा नम्बर १ लप्चीको सिमानामा पर्ने स्थानीमा चिनियाँ नागरिकले सामाजिक सञ्जालमा राखेको भिडियो र तस्बिर हालेका इलाका प्रहरी कार्यालय सिंगटीले जानकारी गराएको छ । पहिरोले नदीको प्रवाह रोकिँदा थुनिएपछि उतातिरको खोला एकै पटक फुटे तामाकोसी नदीमा बाढी आउने खतरा छ ।

 

स्थानीय प्रशासनले दोलखा र आसपास जिल्लाका नदी तटीय क्षेत्रका बासिन्दालाई उच्च सतर्कता अपनाउन आग्रह गरेको छ । जिल्ला प्रशासन कार्यालय दोलखाले शुक्रबार राती पौने १० बजे सार्वजनिक सूचना जारी गर्दै चीनको सिमा क्षेत्रमा रहेको टिंग्री कन्ट्रीको रोङछिया सहर र उक्त क्षेत्र आसपास भारी वर्षासँगै पहिरो आउँदा नदीको प्रवाह रोकिन गएको सूचना प्राप्त भएको बताएको छ ।

 

सोही कारण तामाकोसीमा नदीमा कुनै पनि बेला पानीको बहाव बढेर बाढी आउन सक्ने जनाइएको छ । बाढी आउने खतराका कारण नेपाल–चीनबीचको सिमानामा रहेका बस्ती तथा तामाकोसी नदी तटीय क्षेत्रमा जोखिमको सम्भावना रहेकाले सो क्षेत्रका बासिन्दालाई सतर्क र सजग रहन भनेको छ । 

 

दोलखाका प्रमुख जिल्ला अधिकारी वासुदेव घिमिरेले वर्षायाममा निम्तन सक्ने सम्भावित खतराबारे चीनको टिंग्री काउन्टीसँग शुक्रबार बेलुकी कुरा हुँदा भारी वर्षा र पहिरोका कारण नेपाल–चीन सीमामा नदीको प्रवाह रोकिएको जानकारी प्राप्त भएको बताए । सो जानकारी प्राप्त हुनासाथ स्थानीय प्रशासनले सूचना जारी गरेर उच्च सतर्कता अपनाउन आग्रह गरेको उनको भनाइ छ ।

 

तामाकोसी नदी नेपाल–चीन सिमानाबाट उद्गम भएर बग्ने गर्छ । तसर्थ, चीनतर्फ भारी वर्षा र बाढीपहिरो आउँदा तामाकोसी नदीमा पनि पानीको बहाव बढ्ने गरेको छ ।

 

तामाकोसी नदीमा बाढी आए नेपाल–चीनबीचको सिमानामा रहेका बस्तीसहित दोलखाको लामाबगर, गोंगर, सिंगटी, तामाकोसी, सितली, किर्नेटार तथा रामेछापको मन्थली र सिन्धुलीको खुर्कोट बजारसम्म क्षति पु¥याउनेछ ।

 

बाढीको खतरापछि माथिल्लो तामाकोसीको सुरुङमा पानी पठाउने काम पनि गए रातीबाटै बन्द गरिएको छ । बालुवा थिग्य्राउने पोखरीको पानीलाई फालेर पूरै खाली गरिएको छ ।

 

१ असारमा तामाकोसी नदीमा एक्कासि आएको बाढीका कारण माथिल्लो तामाकोसीको जलाशय काठको मुढा र लेदोले भरिएको थियो । ती मुढा र लेदोलाई झिकिएको आयोजनाले जनाएको छ ।

 

आयोजनामा बाढी आउने सूचनापछि माथिल्लो तामाकोसीको जलाशयको सतह ९ मिटर घटाइएको छ भने बालुवा थिग्य्राउने पोखरी पूरै खाली गरिएको छ । जलाशयको पानी घटाएर न्यूनतम बिन्दुमा झारिएका कारण तामाकोसी नदीमा बाढी आइहाले कम्तीमा एकदेखि डेढ घन्टा बाँधले थेग्न सक्नेछ ।