असार २५, २०७८
डडेल्धुरा- डिभिजन वन कार्यालय डडेल्धुराले महाभारत वन जोगाउन ४५ परिवारलाई निःशुल्क ग्यास सिलिन्डर तथा चुल्हो वितरण गरेको छ । बिहीबार जिल्लाको अमरगढी नगरपालिका वडा नम्बर २ को आइत बजारमा ग्यास सिलिन्डर तथा चुल्हो वितरण गरिएको हो ।
वडा नम्बर २ का जोशिना गाउँका दलित तथा गरिब घरपरिवारलाई ग्यास सिलिन्डर तथा चुल्हो वितरण गरिएको डिभिजन वन कार्यालय डडेल्धुराले जनाएको छ ।
घरायसी प्रयोजनका लागि दाउरा बाल्न रुख काट्दा वन फडानी हुँदै आएकाले ग्यास सिलिन्डर तथा चुल्हो वितरणले केही मात्रामा नियन्त्रणमा आउने जिल्ला समुन्वय समिति डडेल्धुराका प्रमुख गणेशराज भट्टले विश्वास व्यक्त गरे ।
खाना पकाउन प्रयोग हुने दाउरा उत्पादन वन क्षेत्रबाटै हुने भएकाले यसबाट बर्सेनि वन विनास बढ्दै गएको पाएपछि रुख काट्ने काममा कमी ल्याउन यो अभियान प्रभावकारी हुने उनको भनाइ छ ।
परम्परागत तरिकाले दाउराले खाना पकाउँदा गृहिणीको स्वास्थ्यमा प्रतिकूल असर पर्ने र समयसमेत खेर जाने गरेकामा अब ग्यास सिलिन्डर तथा चुल्हो पाएपछि सहज हुने अमरगढी नगरप्रमुख विशेश्वरप्रसाद ओझाले बताए ।
डडेल्धुरामा रहेको महाभारत वन जोगाउने उद्देश्यअनुसार नै ग्यास सिलिन्डर तथा चुल्हो वितरण गरिएको डिभिजन वन प्रमुख विष्णुप्रसाद आचार्यले जानकारी दिए ।
महाभारत वन क्षेत्रको प्रेसर कम होस् भन्ने उद्देश्यले गरिब तथा दलित परिवारलाई ग्यास सिलिन्डर तथा चुल्हो वितरण गरिएको उनको भनाइ छ । खाना पकाउनैका लागि वनमा आश्रित भइरहेका बेला ग्यास सिलिन्डर तथा चुल्हो पाएपछि सहज हुने स्थानीय धर्मादेवी सार्कीले बताइन् ।
‘हरेक दिन दाउरा लिन वन जाँदा समस्या हुन्थ्यो । सिलिन्डर तथा चुल्हो पायौँ । हामी खुसी छौं,’ उनले भनिन्, ‘ग्यास सिलिन्डर तथा चुल्हो सहयोग गरेकामा वन कार्यालयलाई धन्यवाद ।’
चैत ०६, २०८०
फागुन ३०, २०८०
फागुन २९, २०८०
चैत १९, २०८०
चैत १९, २०८०
चैत २२, २०८०
चैत १८, २०८०
