काभ्रे– काभ्रेको नमोबुद्ध नगरपालिकामा अपांगता भएकाहरूका लागि स्वास्थ्यसहितका अत्यावश्यक सहायक सामग्री वितरण गरिने भएको छ । 

वडा कार्यालयमार्फत सबै वडामा रहेका अपांगता भएका व्यक्तिका लागि वितरण गर्न लागिएको सहायक सामग्री र स्वास्थ्य सामग्री आइतबार नगर प्रमुख टिपी शर्मा तिमल्सिनाले सम्बन्धित वडाका वडाध्यक्षहरूलाई हस्तान्तरण गरे ।

नगरपालिका स्तरीय अपांगता परिचयपत्र सिफारिस समन्वय समिति संयोजक एवं उपप्रमुख रामदेवी तामाङको अध्यक्षतामा भएको कार्यक्रममा ह्विल चियर १४ वटा, कमोड ट्वाइलेट १३ वटा, बैसाखी ६ वटा, दृष्टिविहीनका लागि सेतो छडी ५ वटा, लठ्ठी १५ वटा, फोस्टिक लठ्ठी एउटा वटा हस्तान्तरण गरिएको छ ।

यस्तै, १०० एमएलको स्यानिटाइजर ३५० थान, मास्क ३५० प्याकेट तथा मसक्विटो लिक्विड ४०५ थान हस्तान्तरण गरिएको छ । 

कार्यक्रममा नगरप्रमुख तिमल्सिनाले चालू आर्थिक वर्षमा स्वास्थ्य क्षेत्रका लागि विशेष कार्यक्रम तय गरिएको र यसबाट ज्येष्ठ नागरिक र अपांगता भएकाहरू थप लाभान्वित हुने बताए ।

उनका अनुसार नगरस्तरीय कार्यक्रमअन्तर्गत दाँतसहितको मुस्कान कार्यक्रमअन्तर्गत १०० जनाको दाँत राख्ने, तिलगंगा आँखा अस्पतालसँगको समन्वयमा सुगर र आँखा युनिट तयारी कार्यक्रम, नेपाल हियरिङ एन्ड स्पिच सेन्टर, यु नेपाल आई प्रोग्राम तिलगंगाको समन्वयमा १०० जनाका लागि कानमा राख्ने मेसिन वितरण हुनेछ । 

यस्तै, ज्येष्ठ नागरिक सेन्टर बत्तीसपुतलीसँगको सहकार्यमा अल्जाइमर्सको उपचार कार्यक्रम तथा कान नसुन्ने एवं आँखा नदेख्ने अपांगता भएका व्यक्तिलाई मोबाइल वितरण गरिनेछ भने विपन्न र अपांगता भएका १ हजार परिवारका लागि पारिवारिक स्वास्थ्य बिमा कार्यक्रम तय गरिएको छ ।

नगर प्रमुख तिमल्सिनाले नगरमा रहेका ज्येष्ठ नागरिकका लागि वृद्धवृद्धा भेटघाट चौतारी निर्माण गरिएको जानकारी दिँदै सामाजिक सुरक्षाबापतको रकम बैंकिङ प्रणालीमार्फत सहज रूपमा वितरण भइरहेको बताए ।

कार्यक्रममा नगरपालिकाका प्रमुख प्रशासकीय अधिकृत राजन पौडेलले अपांगता भएका व्यक्तिका लागि हस्तान्तरण भएका सामग्री सम्बन्धित वडा कार्यालयमार्फत वितरण हुने जानकारी दिए । उनले नगरपालिकाका प्रशासकीय भवनका साथै सबै वडा कार्यालय एवं स्वास्थ्य संस्था अपांगमैत्री बनाइएको
बताए । 

नमोबुद्ध नगरपालिका महिला बालबालिका तथा समाजकल्याण उपशाखा प्रमुख तारादेवी सुरुवारका अनुसार आर्थिक वर्ष २०७७/७८ अन्त्यसम्म नगरपालिकामा ३५० जना अपांगता भएका व्यक्ति छन् । चालू आर्थिक वर्षमा पनि थप अपांगता परिचयपत्र वितरण भइरहेको उनले जानकारी दिइन् ।