कैलाली– धनगढी उपमहानगरपालिका वडा नम्बर १७ धुरझन्नामा एक दिने आँखा शिविरबाट ३४० जनाको निःशुल्क आँखा परीक्षण गरिएको छ । धनगढी उपमहानगर, चौधरी फाउन्डेसन, लायन्स क्लब अफ धनगढी एभरेष्ट र च्यारिटी फाउन्डेसनको आयोजनामा गरिएको निःशुल्क आँखा शिविरबाट गाउँमै उपचार पाउँदा स्थानीय खुसी भएका छन् ।

गाउँमा आएर स्वास्थ्यकर्मीले आँखाको परीक्षण गर्नुका साथै निःशुल्क औषधी वितरण गरेपछि खुसी लागेको स्थानीय चक्रबहादुर चौधरीले बताए । गाउँमै आँखाको निःशुल्क उपचार गराउन पाउँदा आफूहरू निकै खुसी भएको उनले बताए । 

शिविरमा २२० जना महिला र १२० जना पुरुष गरी ३४० जनाको आँखा परीक्षण गरिएको र सबैलाई निःशुल्क औषधी पनि दिइएको चौधरी ग्रुपका सुदूरपश्चिम प्रदेश प्रशासक स्माइल चौधरीले जानकारी दिए । उनका अनुसार परीक्षण गरिएकामध्ये ६० जनामा मोतिबिन्दु देखिएकाले अपरेसनका लागि सिफारिस गरिएको छ । 
धनगढी नेत्रालयमा उनीहरूको निःशुल्क शल्यक्रिया हुनेछ ।

यसैगरी नजिक देख्न समस्या हुने ७१ जनालाई शिविरमै निःशुल्क चस्मा प्रदान गरिएको छ । शिविरमा वडा नम्बर १७ का पथरीलगायत अरु गाउँका स्थानीयले समेत आँखाको उपचार गराए । निःशुल्क आँखा शिविरमा धनगढी नेत्रालयका दृष्टि विशेषज्ञ आशीष पाण्डेयको नेतृत्वमा प्राविधिकको टोलीले आँखा परीक्षण गरेको थियो ।

यसैगरी नेत्र सहायक नरेश चौधरी, मेलिना मडै, दीक्षा जोशी, संगीता बम, अप्टिकल सहायक हेमा चन्दले सेवा प्रदान गरेको शिविर संयोजक त्रैलोक्यनाथ पाण्डेयले जानकारी दिए । निःशुल्क आँखा शिविरमा धनगढी उपमहानगर प्रमुख नृपबहादुर वडले उपमहानगरका अरू वडामा पनि निःशुल्क आँखा शिविर सञ्चालन गरिने बताए ।