असोज १६, २०७८
सप्तरी– प्रदेश २ को मुख्यमन्त्री कार्यालयमा अख्तियार दुरुपयोग अनुसन्धान आयोगले छापा मारेको विरोधमा जनता समाजवादी पार्टीका युवा, विद्यार्थीसहितका नेता, कार्यकर्ताले शनिबार बेलुकी सप्तरीको राजविराजमा मसाल जुलुससहितको प्रदर्शन गरेका छन् ।
राजविराजस्थित शिव मन्दिर अगाडिबाट निस्केको जुलुस नगरका विभिन्न भाग परिक्रमा गर्दै जनआन्दोलन चोक पुगेर कोणसभामा परिणत भएको थियो । कोणसभाका वक्ताले अख्तियारले छानबिनका नाममा जबर्जस्ती गर्न खोजेको आरोप लगाए ।
सभामा जसपा महिला नेतृद्वय रमिला साह र गीता यादव, विद्यार्थी नेता शम्भु यादव, केदार यादवलगायतले अख्तियारले आप्mना पार्टीका मुख्यमन्त्रीको कार्यालयमा छापा हानेर गलत गरेको बताए ।
मसाल जुलुसमा राजविराज नगरपालिकाका प्रमुख शम्भुप्रसाद यादव, जसपा प्रदेश २ का सचिव दिनेशकुमार यादव, जिल्ला अध्यक्ष केदार यादव, जिल्ला उपाध्यक्ष निरज मुक्ति, युवा नेता सत्येन्द्र यादवलगायतका नेता तथा कार्यकर्ता सहभागी थिए ।
बेटी बचाऊ बेटी पढाऊ कार्यक्रममा अनियमितता भएको आशंकामा अख्तियारको मुख्यालय र बर्दिबासको टोलीले चार दिनअघि मुख्यमन्त्री तथा मन्त्रिपरिषद् कार्यालयमा छापा हानेर केही कागजात लगेको थियो ।
अख्तियारको छापामारीविरुद्ध जसपाको केन्द्रीय समिति र प्रदेश समितिले विरोध गरेका छन् । मुख्यमन्त्रीकै कार्यालयमा छापा हानेर बेटी बचाऊ बेटी पढाऊजस्तो लोकप्रिय कार्यक्रमलाई बदनाम गराउन र सरकार प्रमुखको शक्ति एवं गरिमामै आघात पुग्ने काम भएकाले अख्तियारविरुद्ध आन्दोलनमा उत्रनु परेको जसपाका नेताहरूले बताए ।
शनिबार प्रदेश २ का सबै जिल्लामा मसाल जुलुस भएको र आइतबार प्रदेशका सबै जिल्ला सदरमुकाममा बृहत् विरोध प्रदर्शनको कार्यक्रम तय गरिएको जसपाले जनाएको छ ।
चैत ०६, २०८०
फागुन ३०, २०८०
फागुन २९, २०८०
चैत १९, २०८०
चैत १९, २०८०
चैत २२, २०८०
चैत १८, २०८०
