उदयपुर– उदयपुरको त्रियुगा नगरपालिकाको समन्वयमा उदयपुर सिमेन्ट उद्योगले अक्सिजनसहितको १५ बेडको आइसोलेसन तयार गरेको छ । उद्योगले संस्थागत सामाजिक उत्तरदायित्वअन्तर्गत अक्सिजन सिलिन्डरसहित १५ बेडको आइसोलेसन तयार गरेको हो ।
त्रियुगा नगरपालिका वडा नम्बर ५ देउरीमा रहेको स्वास्थ्य केन्द्र र वडा नम्बर १६ सुकौरामा रहेको स्वास्थ्य केन्द्रमा ५–५ वटा अक्सिजन सिलिन्डर राखेर आइसोलेसन तयार गरिएको हो । जिल्ला स्वास्थ्य कार्यालय उदयपुर र त्रियुगा नगरपालिकाको संयुक्त पहलमा आइसोलेसन तयार पारिएको हो ।
कोरोनाका बिरामीलाई लक्षित गरी अक्सिजन सिलिन्डरसहित आइसोलेसन तयार गरिएको उदयपुर सिमेन्ट उद्योग जलजलेले जनाएको छ । सुकौरामा ५ र देउरीमा १० बेडको आइसोलेसन तयार गरिएको उदयपुर सिमेन्ट उद्योगका बिक्री विभाग प्रमुख रामबहादुर जिसीले जानकारी दिए ।
होम आइसोलेसनमा बस्न असहज भएकालाई लक्षित गरी संस्थागत आइसोलेसन निर्माण गरिएको त्रियुगा नगरपालिका प्रमुख बलदेव चौधरीले जानकारी दिए । सो आइसोलेन उदयपुर सिमेन्ट उद्योग जलजलेको परिसरमै रहेको छ ।
त्रियुगाको वडा नम्बर ५ देउरीमा रहेको आइसोलेसन उद्योगको प्लान्ट नजिक छ भने वडा नम्बर १६ सुकौरामा निर्माण गरिएको आइसोलेसन उद्योगको चुनढुंगा खानी भएको स्थानमा छ । कोभिडबाट उद्योगको कर्मचारी बिरामी भए पहिलो प्राथमिकता उनीहरूलाई दिइने त्रियुगा नगरपालिका स्वास्थ्य शाखा उपप्रमुख अबधनारायण चौधरीले बताए ।
त्यसैगरी दुवै स्वास्थ्य केन्द्रलाई प्रशासनमार्फत ५–५ लिटर स्यानिटाइजर, २५० पिसका दरले मास्क र ५–५ वटा अक्सोमिटर प्रदान गरिएको छ ।