बैतडी– बैतडीको पाटन नगरपालिकाले कक्षा ६ देखि ८ सम्मको आधारभूत तहमा संस्कृत विषय पढाउने भएको छ । भाषागत ज्ञानको विकास गर्ने भएकाले कक्षा ६ देखि ८ सम्म संस्कृत विषय पठनपाठन गराउने निर्णय भएको नगरपालिकाका शिक्षा शाखा प्रमुख बिर्खराज भट्टले जानकारी दिए ।
कक्षा ६ देखि ८ सम्म एउटा विषय स्थानीय अथवा अन्य कुनै विषय पढाउनुपर्ने भएकाले संस्कृत विषय पठनपाठन गर्ने निर्णय गरिएको उनले जानकारी दिए । उनले भने, ‘संस्कृत विषय पढाउन हामीसँग जनशक्ति पनि छ ।’
संस्कृत विषयको पाठ्यक्रम र पाठ्यपुस्तकसमेत तयारी अवस्थामा पाइने भएकाले पढाउन सहज हुने नगरपालिकाले जनाएको छ । पछिल्लो समय संस्कृत विषयको पढाइ नहुँदा भाषागत समस्या देखिएकाले नैतिक शिक्षा र भाषागत ज्ञानको विकासका लागि पनि संस्कृत विषयले महत्त्वपूर्ण योगदान पु¥याउने नगरपालिकाको विश्वास छ । नगरपालिकाले कक्षा ६ देखि ८ सम्म संस्कृत विषयको पठनपाठन गराउने व्यवस्था मिलाउन विद्यालयलाई निर्देशनसमेत दिइसकेको छ ।
पाटन नगरपालिकाले संस्कृत विषय रोजे पनि यो विषय उपयुक्त नभएको सरोकारवाला बताउँछन् । पाटन वडा नम्बर १ स्थित सिद्धनाथ माविका प्रधानाध्यापक लक्ष्मण बोहराले भने, ‘अहिले प्राविधिक, सीपमूलक विषय वा कम्प्युटर शिक्षा समावेश गर्नुको सट्टा संस्कृत विषय रोज्नु उचित होइन । संस्कृत पढेर भविष्यमा यसैलाई निरन्तरता दिनेका लागि भने ठीकै हुन्छ ।’
पाटन वडा नम्बर १ स्थित सिद्धेश्वर मावि मेल्चोराका प्रधानाध्यापक प्रकाश विकले अहिले संस्कृत बिषय पढाउने शिक्षक नभएकाले समस्या हुने बताए ।
पाठ्यक्रम विकास केन्द्रले एक विषय स्थानीय तहको सिफारिसमा पढाउन मिल्ने भनेपछि पाटन नगरपालिकाले संस्कृत पढाउने निर्णय गरेको हो ।
उक्त विषयको सट्टा प्राविधिक विषय, मातृ भाषा तथा आफैंले तयार गरेको स्थानीय पाठ्यक्रमसमेत पढाउन मिल्नेमा पाटनमा संस्कृत पढाइने भएको हो ।