काठमाडौं । मिटरब्याजी सप्तरीका रामदेव साह तेली र उनको परिवारबाट ठगीमा परेका सर्वसाधारणलाई प्रहरीको सम्पर्कमा आउन आग्रह गरिएको छ । सप्तरीले प्रहरीले आज सूचना जारी गरेर लिएको ऋण रकमको साँवा ब्याज चुक्ता गर्दासमेत घरजग्गा समेतको जायजेथा फिर्ता नपाई वा अन्य किसिमले ठगीमा परेको भए आवश्यक प्रमाणसहित आउन सर्वसाधारणमा जिल्ला प्रहरी कार्यालय सप्तरीले आग्रह गरेको हो ।

जिल्ला प्रहरी कार्यालय सप्तरीका सूचना अधिकारी प्रहरी निरीक्षक भानु खड्काले आज सूचना जारी गर्दै खड्क नगरपालिका–७ कल्याणपुरका रामदेव, उनकी श्रीमती शिवकुमारी देवी साह, छोरा नन्दकिशोर साह तेली, छोरी रेनुकुमारी साह र अनुराधाकुमारी साहले विभिन्न व्यक्तिलाई ठगी गरेको जाहेरी परी अनुसन्धान भइरहेको जनाएको छ ।
    
आरोपितले मालपोत कार्यालयबाट धितोस्वरुप विभिन्न मानिसको घरजग्गा तथा अन्य जायजेथा रजिष्ट्रेशनको लिखत पास गराई चर्को ब्याजमा ऋण लगानी गर्ने र लिएको ऋण रकमको साँवाब्याज चुक्ता गर्दासमेत घरजग्गा समेतको जायजेथा फिर्ता नगरी ठगी गर्ने गरेको प्रहरीद्वारा जारी सूचनामा उल्लेख छ । 

मिटरब्याजी साहविरुद्ध गत सोमबार पीडितले राजविराजमा विरोध प्रदर्शन गरेका थिए । नेपाल प्रहरीले नन्दकिशोर र अनुराधालाई पक्राउ गरे पनि मुख्य आरोपित रामदेव, शिवकुमारी, रेणुकुमारी, चन्दनकुमार र धनुषा खरिहानी टोलका कैलाश साहलाई पक्राउ गर्न सकेको छैन ।