कात्तिक २२, २०७७
डडेल्धुरा– डडेल्धुराको अजयमेरु गाउँपालिका गाउँटोलदेखि केन्द्रसम्मकै खेलकुद आयोजना गर्न मिल्ने गरी राष्ट्रिय स्तरको खेल मैदान निर्माणमा जुटेको छ । गाउँपालिकाले खेल क्षेत्रमा युवा आकर्षण बढाउन मैदान निर्माण सुरु गरेको हो ।
करिब २० करोडको लागतमा बहुवर्षीय योजना बनाई वडा–३ को चनबेतालमा खेल मैदान निर्माण गर्न लागिएको हो । गाउँपालिकाले गुरुयोजना बनाएर निर्माण गरिरहेको खेल मैदानका लागि दुई आर्थिक वर्षमा करिब ४० लाख रुपैयाँ खर्च गरिसकेको छ ।
मैदान निर्माणका लागि चालु आर्थिक वर्षमा ३५ लाख रुपैयाँ विनियोजन गरेको छ । यसका लागि टेन्डर आह्वान भइसकेको छ । केही दिनमै खेल मैदान निर्माण सुरु हुने गाउँपालिका अध्यक्ष उमेश भट्टले जानकारी दिए । ‘१ सय ५० मिटर लम्बाइ र ८० मिटर चौडाइ रहने खेल मैदान अहिले सम्याउने काम अन्तिम चरणमा पुगेको छ । योे काम सकिएपछि चालू आर्थिक वर्षमा पर्खाल लगाउनेछौं’, अध्यक्ष भट्टले भने ।
खेल मैदानमा प्याराफिट लगाउने, स्विमिङ पुल, शौचालय, कभर्ड हलसहितका विभिन्न भौतिक संरचना निर्माण गरिनेछन् । अजयमेरुले एक वडा एक खेल मैदान निर्माण गर्ने योजनाअनुसार गाउँपालिकाका बाँकी पाँचै वडामा पनि काम सुरु भएको छ ।
खेलकुदको विकासका लागि पालिकाले पाँच खेल प्रशिक्षकसमेत चयन गरेको छ । गाउँपालिका स्तरमै सुविधासम्पन्न खेल मैदान निर्माण थालिएसँगै खेलप्रमी उत्साहित भएका छन् ।
चैत २४, २०८०
चैत १३, २०८०
चैत १९, २०८०
चैत १९, २०८०
चैत २२, २०८०
