कात्तिक ०२, २०७७
पोखरा– कास्कीको मादी गाउँपालिकाले घटस्थापनाको अवसरमा भेडाको बलि दिएर राष्ट्रिय झण्डको पूजा गरेको छ ।
गाउँपालिका सुरु भएकै समयदेखि प्रत्येक वर्ष घटस्थापनाको दिन हिमाली क्षेत्रमा हुर्किएको भेडाको साढेलाई बलि दिएर पूजा गर्दै आएको छ ।
गाउँपालिकाले कार्यालयले दशैंको अवसर पारेर नेपालको नयाँ झण्डा राखेको छ । झण्डा पूजापछि चाडबाडको शुभकामना आदानप्रदान समेत गरिएको छ ।
कार्यक्रममा जिल्ला समन्वय समिति कास्कीका सभापति बैनबहादुर क्षेत्रीले संघीयतापछि गाउँगाउँमा विकासको लहर सुरु भएको बताए । अहिले आधारभुत तहमा रहेकोले केही समयपछि विकासको प्रत्यक्ष लाभ जनताले पाउने उनको भनाई छ ।
‘हिजो स्थानीय सरकार आउनुअघि मादीको अवस्था कस्तो थियो र आज अवस्था के छ ?,’ उनले भने, ‘मादी कास्कीकै विकट कर्णाली क्षेत्र जस्तो हो । अब यो ठाउँपनि विकासले बल्न थालेको छ ।’
जिल्ला समन्वय समितिको सहयोगमा मादी गाउँपालिकाभित्र मात्रै झोलुङ्गे पुल, पक्की पुल निर्माण सकिएको छ भने थप पक्की पुलको पहल भइरहेको उनले बताए । गाउँपालिका अध्यक्ष वेदबहादुर गुरुङले अहिले कोभिडको महामारीका बेला पनि आफूहरुले परम्परालाई निरन्तरता दिएको भन्दै झण्डा पूजा निरन्तर गरिरहने बताए ।
सोही अवसरमा मादी ७ मा २३ वर्षसम्म करार दरबन्दीमा सेवा गरेका कर्मचारी मीनबहादुर गुरुङलाई विदाई गरिएको छ । उनलाई दोसल्ला, सम्मानपत्र र नगद ४५ हजार रुपैयाँ प्रदान गरिएको हो ।
चैत २४, २०८०
चैत १३, २०८०
चैत १९, २०८०
चैत १९, २०८०
चैत २२, २०८०
चैत १८, २०८०
