‘संन्यासी बन्न राजनीति गरेको होइन ।’ जनताको सेवाका लागि राजनीतिमा हाम फालेकाहरूले अहिले भन्ने शब्दवाण यस्तै हुने गर्छन् । तर, राजनीतिलाई पेसा बनाएर पनि सादगी जीवन जिउन चाहनेहरू पनि यही समाजमै छन् । सांसद भयो, मन्त्री बन्यो अनि आफू र  आफ्ना वरपरकालाई लाभको अवसर दिनेहरू राजनीतिमा टिकिरहेका छन् । तर, जनताको सेवाका लागि राजनीति गरिरहेकालाई भने टिक्नै गाह्रो । 

मन्त्री भएपछि निवर्तमान हुन नचाहनेहरूलाई गतिलो पाठ पढाएका एक पूर्वकृषिमन्त्री लोकेन्द्र विष्ट मगरको संसार भने बेग्लै छ । कृषि कर्म गरेरै उनको स्थान उँचो छ । समाज परिवर्तन गर्ने कसम खाएर सशस्त्र द्वन्द्वको नेतृत्व गर्दै भूमिगत राजनीति गरेका र जनयुद्वको कमान्डर हुँदै मन्त्रीसमेत बनेका पूर्वमन्त्री लोकेन्द्रबहादुर विष्ट मगर यस्ता उदाहरणीय पात्र हुन्, जसको सिको अहिलेसम्म कसैले गरेकै छैन । 

आफूलाई पूर्वमन्त्रीभन्दा किसान भन्न रुचाउने विष्ट राजनीतिलाई बाईबाई गरेर कृषि क्रान्तिमा लागेका छन् । खनीखोस्री गरेर सामान्य जीवन निर्वाह गर्छन् । 
पूर्वमन्त्री अर्थात् ‘ड्रागन फलपूmल बा’ विष्टले अहिले दाङमा नमुनायोग्ग काम थालेका छन् । राजनीति छाडेर कृषिमा हाम फालेका पूर्वमन्त्री तथा कम्युनिष्ट नेता लोकेन्द्र विष्ट मगरको बारीमा नेपालमै कम उत्पादन हुने ड्रागन फल अहिले लटरम्मै फलेको छ । 

अहिलेसम्म पाँचौ लटको उत्पादन भित्र्याइसकेका विष्ट दाङमा यसको व्यावसायिक उत्पादन पहिलो भएको सुनाउँछन् । बाँझो जमिनलाई भाडामा लिएर थालेको यो व्यवसाय अहिले बालुवामा सुन फलेजस्तो भएको उनको अनुभव छ । 

‘पाँचौ  लटको उत्पादन १६ हजार क्विन्टल ड्रागन फल बजारमा पुगिसकेको विष्ट बताउँछन् । असारमा पहिलो लट उत्पादन भएको ड्रागन फल असोजसम्म पाँचौ लट निस्केको छ । ‘तुलसीपुर उपमहानगरपालिका–१८ बिजौरी मैरवास्थित बाँझो जमिनलाई सदुपयोग गरेर दुई वर्षदेखि व्यावसायिक ड्रागन फलको खेती गर्दै आएको छु’, विष्ट भन्छन् । 

हालसम्म रोपिएका ७ हजार बिरुवामध्ये २ हजार ५ सय सेतो प्रजाति र ४ हजार ५ सय रातो प्रजातिका रहेको र यो वर्ष मात्रै ७ सय बिरुपा थपेको विष्ट सुनाउँछन् । ‘हरेक बोटमा ५ देखि २५ वटासम्म फल लागेका छन्’, विष्ट खुसी सुनिन्छन्, ‘पछिल्लो लटमा रोपेका थप ४ हजार बिरुवाले अझै फल दिन सुरु गरेका छैनन् । ती सबै बोटले फल दिएपछि एकै लटमा कम्तीमा १० क्विन्टल ड्रागन फल तयार हुनेछ ।’

ड्रागन खेतीमा हालसम्म १ करोड हाराहारी लगानी भइसकेको र यसका साथै सर्पगन्धा, पेपिलो मेलन, कुरिलो, काँक्रा, फर्सी, मकै, जडीबुटी तथा अन्नबाली पनि घुसुवा बालीका रूपमा गर्दै आएको विष्ट सुनाउँछन् । विष्टको बगैंचामा ड्रागन फल उत्पादन हुने जमिनमा अन्य बाली र त्यसमाथि ड्रागन फल उत्पादन भइरहेको छ  ।