फागुन १०, २०८०
गोरखा– गाउँपालिकाको सिमित स्रोत साधन । त्यसमा पनि दक्ष जनशक्ति बस्न नमान्ने समस्या । यस्तै समस्या भोग्दै आएको भिमसेनथापा गाउँपालिकाले सिमित स्रोत साधनका बाबजुद स्थानीयलाई स्वास्थ्य सुविधा उपलब्ध गराउँदै आएको छ ।
गत आर्थिक वर्षदेखि गाउँपालिकाले चिकित्सकमार्फत सेटलाइट क्लिनिक सञ्चालन गरेर प्रत्येक वडामा चिकित्सक सेवा उपलब्ध गराउँदै आएको हो । गाउँपालिकाको अस्पतालका डाक्टरले प्रत्येक वडाका स्वास्थ्य चौकीमा पुगेर सेवा दिँदै आएको पालिकाका स्वास्थ्य शाखाका प्रमुख भेषराज खनालले बताए ।
उनका अनुसार गाउँपालिकामा एउटा अस्पताल छ । शहीद स्मृति आधारभुत अस्पाताल गाउँपालिकाभित्र रहेको अस्पताल हो भने डा. सुदन अधिकारी गाउँपालिकाका एक्लो डाक्टर हुन् ।
डा. अधिकारीले गाउँपालिकाको प्रत्येक हप्ता एउटा स्वास्थ्य चौकीमा गरि गाउँपालिकाका ८ वटै वडाका स्वास्थ्य चौकीमा पुगेर सामान्य स्वास्थ्य जाँच तथा अस्पतालमा ‘रेफर’ गर्दै आएका छन् ।
प्रत्येक हप्ता एउटा स्वास्थ्य चौकीमा पुग्दा प्रत्येक २ महिनामा सबै वडामा चिकित्सकमार्फत सेटलाइट क्लिनिक सेवा प्रदान गरिने स्वास्थ्य शाखा प्रमुख खनालले बताए ।
यसअघि अस्पतालमा दुई जना डाक्टर कार्यरत रहेपनि गाउँको अस्पतालमा काम नगर्ने भन्दै छाडेकाले स्थानीयलाई सेवा दिन समस्या रहेको उनले बताए । उनले भने, ‘दुई जना डाक्टर भएको भए एक महिनामा सबै वडामा सेवा दिन सकिन्थ्यो । एक जना मात्र भएर सबै पालिकामा पुग्न दुई महिना लाग्छ ।’
यस्तै गाउँपालिकाले गत आर्थिक वर्षबाटै एक महिनामा एउटा वडामा निःशुल्क आँखा जाँच तथा उपचार सेवा उपलब्ध गराउँदै आएको उनले बताए । स्वास्थ्य शाखा प्रमुख खनालले भने, ‘आँखासम्बन्धि सेवा सञ्चालन गर्न जिल्लाकै लायन्स आँखा सेवा केन्द्रसँग सम्झौता गरेका छौँ ।’
चैत १२, २०८०
फागुन २९, २०८०
फागुन २८, २०८०
चैत २२, २०८०
चैत २३, २०८०
चैत २२, २०८०
