प्युठान– प्युठानको झिमरुक गाउँपालिकाले सुरक्षित नागरिक आवास कार्यक्रमअन्तर्गत लाभग्राहीमध्येबाट छनोट भएका अतिविपन्न गरिब परिवारलाई खरका छाना हटाउन अनुदान दिने भएको छ ।
गाउँपालिकाभरका २०० घरधुरीलाई प्रतिघरधुरी ५० हजार रुपैयाँका दरले अनुदान रकम उपलब्ध गराइन लागेको हो ।
झिमरुकका ८ वटै वडाका गाउँबस्तीमा रहेका खर तथा परालको छाना भएका घरपरिवारलाई जस्तापाताको छानामुनि ल्याउने गरी यो कार्यक्रम सुरु गरिएको गाउँपालिका अध्यक्ष तिलक जिसीले बताए ।
उनले भने, ‘छनोटमा परेका लाभग्राहीसँग वडा कार्यालयमार्फत सम्झौता गर्ने काम सुरु गरेका छौँ । आर्थिक अवस्था कमजोर रहेका र पराल र खरको छाना भएका घरधुरीका परिवारलाई यो कार्यक्रममा समावेश गरेका हौँ ।’ चालू आवका लागि १ करोड रुपैयाँ सुरक्षित नागरिक आवास कार्यक्रमअन्तर्गत पालिकालाई सरकारले अनुदान उपलब्ध गराएको छ ।
झिमरुकको वडा नम्बर १ मा ४८ घरधुरी, २ मा १३, ३ मा ३१, ४ मा १९, ५ मा १०, ६ मा ५५ र ७ मा २४ घर गरी जम्मा २ सय घरधुरीमा जस्तापाता लगाउन थालिएको छ । वर्षौंदेखि खरको चुहिने छानोमुनि बस्दै आएकाले जस्तापाता लगाउन अनुदान पाउँदा खुसी लागेको स्थानीय विष्णु सुनारले सुनाइन् ।