फागुन २३, २०८०
पाल्पा– रिब्दीकोट गाउँपालिकाले मदिरा पिउने व्यक्तिलाई अझ थप प्रोत्साहन गर्न नभई त्यस्तो कुलतबाट छुटाउन उक्त कार्यक्रम सञ्चालन गरेको स्पष्ट पारेको छ ।
गाउँपालिकाले फागुन १७ गते विपन्न (श्रमिक) वर्गलाई सचेतना तथा सम्मान कार्यक्रम र निःशुल्क स्वास्थ्य बिमा कार्यक्रम सञ्चालन गरेको थियो । सो कार्यक्रम मदिरा पिउने व्यक्तिलाई थप प्रोत्साहन गर्न गरिएको बुझिएकाले सो नभई मदिरा छाड्न प्रोत्साहन गर्ने उद्देश्यले कार्यक्रम सञ्चालन गरेको गाउँपालिकाले जनाएको छ ।
पालिकाले गरिखाने वास्तविक विपन्न श्रमिक वर्गलाई काममा प्रोत्साहन गर्न तथा मदिरा सेवन गरी आफ्नो स्वास्थ्य, परिवार र समाजलाई समेत प्रभाव पारिरहेकाले सो कार्यक्रम सञ्चालन गरेको जनाएको छ । कार्यक्रममा मदिरामा फसेका मजदुर वर्गलाई त्यस्तो कुलतबाट छुटाउनको लागि मदिराले पार्ने खराब/असरको बारेमा समाज सेवामा लागेका बौद्धिक व्यक्ति, स्वास्थ्यकर्मी र सुरक्षाकर्मीबाट प्रशिक्षणात्मक सचेतना कार्यक्रम सञ्चालन गरेको गाउँपालिकाका अध्यक्ष नारायणबहादुर कार्कीले बताए ।
पालिकाभित्र मदिरा सेवनले ३० देखि ४० वर्ष उमेर समुहका युवाहरुको ज्यान जाने क्रम बढेपछि गाउँपालिकाले कुलतबाट युवालाई जोगाउन सो कार्यक्रम सञ्चालन गरेको उनले बताए । अध्यक्ष कार्कीले आफ्नाे सेवा सुविधाबाट स्वास्थ्य बिमासमेत गरिदिएका छन् ।
पालिकाले वडा वडामा विपन्न (श्रमिक) वर्ग तथा मदिरामा फसेका व्यक्तिको विवरण माग गरेको थियो । सबै वडाबाट गाउँपालिकाका ६५ जना मदिरामा फसेका विपन्न श्रमिकको विवरण प्राप्त भएको थियो । विवरणमा भएका व्यक्तिलाई सम्मान, अभिमुखिकरण तथा स्वास्थ बिमा गर्न गाउँपालिकाले निमन्त्रणा गरेको र कार्यक्रममा ४० जना उपस्थित भएको उनले बताए ।
कार्यक्रममा सहभागी भएका व्यक्तिले बिस्तारै कुलत छाड्दै जाने प्रतिवद्धतासमेत जनाएको गाउँपालिकाका अध्यक्ष कार्कीले पालिकाखबरलाई बताए ।
बैशाख १९, २०८१
चैत ०६, २०८०
फागुन ३०, २०८०
चैत २२, २०८०
चैत २३, २०८०
