भदौ १८, २०८१
मंसिर २६, २०७७
स्याङ्जा– स्याङ्जाको आँधीखोला गाउँपालिकाद्वारा पर्यावरणीय सन्तुलन कायम गर्न आँधीखोलामा ५२ हजार माछाका भुरा छाडेको छ । गाउँपालिकाले स्याङ्जास्थित कालीगण्डकी माछा प्रजनन् केन्द्रबाट १४ पोका भुरा ल्याएर आँधीखोलाका विभिन्न सात ठाउँमा छाडेको हो ।
माछाको पारिस्थितिकीय प्रणालीमा असर परेको भन्दै वातावरणीय प्रभाव सन्तुलनका लागि माछाका भुरा छाडिएको गाउँपालिकाले जनाएको छ ।
आयातीत माछाका प्रजातिका कारण परम्परागत र स्थानीय माछा लोप हुने खतरा बढेपछि स्थानीय जातका माछाका भुरा छाडिएको आँधीखोला गाउँपालिका अध्यक्ष सुधीरकुमार पौडेलले बताए ।
‘नदी, ताल र तलाउको जैविक विविधता कायम गर्न, पानी शुद्ध राख्न र पानीमा अक्सिजनको मात्रा बढाउन माछाको भूमिका महत्त्वपूर्ण हुन्छ । जैविक विविधता नभएका नदी तथा तालको कुनै महत्त्व हुँदैन’, उनले भने ।
खोलामा साना भुरा छाड्दा बकुल्लालगायतका विभिन्न चरा तथा सर्पले समेत खाने सम्भावना बढी भएकाले कम्तीमा पनि १० देखि १५ ग्रामका माछा छाडिएको कृषि प्राविधिक विवेक आचार्यले बताए । ठेडे, हाँडे र गर्दी जातका माछाका भुरा जलाशयमा ल्याएर आँधीखोलामा छाडिएको उनले जानकारी दिए ।
कात्तिक १४, २०८१
