भदौ १८, २०८१
भदौ २१, २०७८
रूपन्देही– गुल्मीको छत्रकोट गाउँपालिकाल ‘कृषक पेन्सन’ कार्यक्रम सुरु गरेको छ । किसानलाई प्रोत्साहित गर्दै कृषि क्षेत्रमा आत्मनिर्भर बनाउन गत आर्थिक वर्षदेखि नै यो कार्यक्रम लागू गरिएको गाउँपालिकाले जनाएको छ ।
कार्यक्रमअन्तर्गत मासिक १ हजार रुपैयाँका दरले कृषक पेन्सनको व्यावस्था गरिएको छ । व्यावसायिक खेती र पशुपालन गरिरहेका किसानलाई उत्पादन र आम्दानीको आधारमा पेन्सन दिइने गाउँपालिका कृषि शाखा प्रमुख सपना भण्डारीले बताइन् ।
कार्यक्रमअन्तर्गत करिब ३१ बढी किसानले पेन्सन लिइरहेको उनको भनाइ छ । गाउँपालिकामा करिब २ सय बढी किसानले व्यावसायिक कृषि खेती गर्छन् ।
तर, गाउँपालिकाले उत्पादन र आम्दानीको आधारमा व्यवसायीलाई क, ख, र ग वर्गमा छुट्याएको गाउँपालिकाले जनाएको छ ।
पेन्सन लिन गाउँपालिकाको कार्यविधिमा भएअनुसार वार्षिक ३ लाख ४० हजार रुपैयाँ बढी आम्दानि गर्ने क वर्गको किसानलाई पेन्सन दिइनेछ । छत्रकोटका अधिकांश व्यावसायिक किसानले सिजनअनुसार टमाटर, काक्रो र सुन्तलाबाट मनग्य आम्दानी लिँदै आएका छन् भने पशुपालनतर्फ बंगुर, खसी, बोका, कुखुराबाट राम्रै आम्दानी गर्दै आएका छन् ।
छत्रकोटका अधिंकाश ठाउँमा सडक पुगेको छ । कृषि पेसामा रमाएका किसानलाई सडक बनेपछि बजारीकरण गर्ने सुविधा भएको छ । छत्रकोट वडा नम्बर १ हुँगाका किसान दानबहादुर पल्ली कृषक पेन्सन कार्यक्रम सुन्दा खुसी लागेको बताउँछन् । उनी छत्रकोटका व्यावसायिक कृषक पनि हुन् । मासिक १ लाख रुपैयाँ बढी आम्दानी गर्ने पल्लीको कृषि फार्ममा १२ भन्दा कामदार छन् ।
मासिक १ लाख रुपैयाँ बढी कमाइ गर्दै आएकामा पालिकाले वास्तविक कृषक पहिचान गरी पेन्सन व्यवस्था गरेकामा खुसी लागेको उनले सुनाए । पालिकाले २०७९ सम्म करिब १ सय किसानलाई पेन्सन दिने लक्ष्य रहेको वडा नम्बर ५ का वडाध्यक्ष कृष्ण पन्तले जानकारी दिए । किसान पेन्सन कार्यक्रम सुरुआत गर्ने छत्रकोट गुल्मीकै पहिलो स्थानीय तह हो ।
कात्तिक १४, २०८१
