ताप्लेजुङ– ताप्लेजुङको पाथीभरा याङ्बरक गाउँपालिकाले सेवानिवृत्त शिक्षक, एसईई परीक्षामा उत्कृष्ट अंक ल्याउने विद्यार्थी र विद्यालयलाई पुरस्कृत तथा सम्मान गरेको छ ।
४२औँ शिक्षा दिवस तथा अन्तर्राष्ट्रिय साक्षरता दिवस अवसरमा ७ सेवानिवृत्त शिक्षक, एसईई परीक्षामा उत्कृष्ट अंक ल्याउने ३ विद्यार्थी र २ विद्यालयलाई पुरस्कृत गरिएको पालिकाका निमित्त शिक्षा अधिकृत भीमप्रसाद दाहालले जानकारी दिए ।
गाउँपालिका अध्यक्ष केशरकुमार सुब्बा र उपाध्यक्ष रनमाया गुरुङले सेवानिवृत्त शिक्षक, उत्कृष्ट बिद्यार्थी र विद्यालयलाई सम्मान तथा पुरस्कार प्रदान गरे ।
दाहालका अनुसार २०७७ को एसईई परीक्षामा उत्कृष्ट नतिजा ल्याउने वडा नम्बर १ नाङ्खोल्याङको कालिमा मावि पहिलो हुँदै २८ हजार रुपैयाँ नगदसहित सम्मानित भएको छ । विद्यालयका प्रधानाध्यापक भक्तिप्रसाद निरौलालाई पालिका अध्यक्ष सुब्बाले नगद तथा सम्मानपत्र प्रदान गरे ।
यस्तै, वडा नम्बर २ मा अवस्थित थेचम्बु माध्यमिक विद्यालय दोस्रो हुँदै नगद २२ हजार रुपैयाँका साथ पुरस्कृत भयो । पालिका उपाध्यक्ष गुरुङले थेचम्बु माविका प्रअ देउप्रसाद मेन्याङ्वोलाई नगद पुरस्कार तथा प्रमाणपत्र प्रदान गरिन् ।
पालिकाले २०७७ को एसईई परीक्षामा उत्कृष्ट अंक ल्याउने ३ विद्यार्थीलाइ नगद र प्रमाणपत्रसहित पुरस्कृत गरेको छ । एसईई परीक्षामा उत्कृष्ट अंक ल्याउने १ छात्र र १ छात्रालाई पुरस्कृत गर्ने पालिकाको योजना रहेकामा दुई छात्रको नतिजा बराबर भएपछि ३ विद्यार्थीलाई समान नगदसहित पुरस्कृत गरेको हो ।
पुरस्कृत हुनेमा छात्रतर्फ कालिका मावि नाङ्खोल्याङका पारस बर्देवा र थेचम्बु मावि थेचम्बुका समीर कार्की रहेका छन् । उनीहरूले एसईई परीक्षामा ३.५० जिपिए प्राप्त गरेका थिए ।
यस्तै, छात्रातर्फ कालिका मावि नाङ्खोल्याङका क्षितिजा दुर्विच रहेकी छन् । उनले ३.४५ जिपिए प्राप्त गरेकी थिइन् । पुरस्कृत हुने ३ जनाले समान १६ हजार ५ सय रुपैयाँ नगद र प्रमाणपत्र पाए ।
पालिकाले सेवानिवृत्त ७ शिक्षकलाई नगद १० हजार रुपैयाँसहित प्रमाणपत्र वितरण गरेको छ । सम्मान पाउनेमा लोकनाथ खतिवडा, बालकृष्ण श्रेष्ठ, घनश्याम पौडेल, केदारलाल न्यौपाने, समतलाल चौधरी, कृष्णप्रसाद अधिकारी र सन्तोषकुमार राजभण्डारी रहेका छन् ।
कार्यक्रममा गाउँपालिका अध्यक्ष सुब्बाले पालिका क्षेत्रको शैक्षिक उन्नयनका लागि सक्दो योगदान दिँदै आएको र अब विशेष कार्ययोजनाका साथ अघि बढ्ने बताए ।
पुरस्कृत विद्यालयका तर्फबाट कालिक मावि नाङखोल्याङका निरौलाले पुरस्कारले आफूहरूको शैक्षिक दायित्व बढाएको सुनाए । सेवानिवृत्त शिक्षक बालकृष्ण श्रेष्ठले लामो समयसम्म शैक्षिक क्षेत्रमा जीवन बिताउँदा पाएको अनुभव पालिका क्षेत्रको शैक्षिक विकासमा खर्चिने प्रतिबद्धता जनाए ।