सप्त्तरी । बोदेबर्साइन नगरपालिकामा विद्यालय शिक्षाको पहुँचभन्दा बाहिर रहेका किशोरी अहिले औपचारिक शिक्षाका लागि नियमित विद्यालय जान थालेका छन् । विद्यालय बाहिर रहेका १० वर्षदेखि १४ वर्ष उमेरका किशोरीलाई विद्यालय शिक्षाको पहुँचमा पु¥याउन नगरपालिकाले विशेष पहल गरेपछि किशोरीहरु विद्यालय जान थालेका हुन् ।

नगरपालिकाले किशोरीलाई विद्यालय जाँदा पुस्तक, झोला र स्टेशनरी प्रदान गरेपछि उनीहरु नियमित विद्यालय जान थालेका हुन् । बोदेवरसाइन नगरपालिका–३ की कुशमाहारकी १४ वर्षीया काजलकुमारीले किशोरी शिक्षा कार्यक्रम बरदान नै सावित भएको बताउँछन् । 

अहिले कक्षा पाँचमा अध्ययनरत किशोरी काजलकुमारीले भने 'अहिले नगरपालिकाले विद्यालय पढ्न जान हामी किशोरीलाई झोला र कपीकलम उपलब्ध गराएपछि विद्यालय जान हौसला बढेको छ ।' 
विद्यालयमा राम्रोसँग पढेर आफू जस्तै पढ्नबाट वञ्चित किशोरीलाई विद्यालयको पहुँचमा पु¥याउन भविष्यमा सहयोग गर्ने काजल बताउँछन्।

यस्तै कक्षा दुई मात्र पढ्न पाएर घरायसी कारणले पढाइ छाडेकी बोदेवर्साइन नगरपालिका–३ गौरा बस्ने १३ वर्षीय सञ्जना पनि आफ्नै घर नजिक सञ्चालन भएको किशोरी शिक्षा केन्द्रका कारण पुनः विद्यालयमा फर्किन पाएकोमा खुसी व्यक्त गरिन् । उनी भन्छिन्,  'किशोरी शिक्षा कार्यक्रम र नगरपालिकाको सहयोगले हामी जस्तो किशोरीको जीवनमा शिक्षाको उज्यालो भरिदिएको हो ।' सञ्जना अहिले दौतरीसँगै स्थानीय चन्द्रा नमुना माध्यमिक विद्यालयमा कक्षा ५ मा पढन् पाएकोमा खुसी छिन् ।  

काजल र सञ्जना जस्तै विद्यालयको शिक्षादेखि बाहिर रहेका एक सय ९८ जना किशोरी अहिले नियमित विद्यालय जान थालेका छन् । नगरपालिकाले किशोरीलाई विद्यालयमा टिकाउन झोला र स्टेशनरी प्रदान गरी उनीहरुको औपचारिक शिक्षाको सारथी बनेको छ । 

बोदे बर्साइन नगरपालिका नगर शिक्षा अधिकृत रामसागर यादवले विद्यालय जान छाडेका किशोरीलाई विद्यालयमा ल्याउन सकेकामा ठूलो उपलिब्ध भएको बताउँछन्। 'किशोरीलाई विद्यालयमा टिकाउन निरन्तर रुपमा अनुगमन गर्नुका साथै अभिभावकसँग पनि भेटघाट गरी उत्प्रेरणा दिने काम गरिरहेका छौँ,' उनले भने, 'अहिले किशोरीहरुलाई विद्यालय नियमित जानका लागि प्रोत्साहनस्वरुप झोला र स्टेशनरी उपलब्ध गराएका छौँ ।'

 नगरपालिकाले युनिसेफको आर्थिक सहयोग तथा जिल्ला समन्वय समिति पर्साको प्राविधिक सहयोगमा किशोरी शिक्षा कार्यक्रम सञ्चालन गरी नगरभित्र विद्यालय बाहिर रहेका १० देखि १४ वर्ष उमेर समूहका किशोरीलाई विद्यालय शिक्षाको पहुँचमा ल्याउन किशोरी शिक्षा कार्यक्रम सञ्चालन गरेको छ । 

कार्यक्रमअन्तर्गत नगरपालिकाका विभिन्न वडामा १० वटा किशोरी शिक्षा केन्द्र सञ्चालन गरेको छ । नौ महिनासम्म समुदायमा किशोरी शिक्षा कक्षा सञ्चालन गर्दा एक सय ९८ जना किशोरी सो कक्षामा अध्ययन गरी अहिले विद्यालयको नियमित शिक्षाका लागि विद्यालय जान थालेका छन् ।