स्याङ्जा– स्याङ्जाको गल्याङ नगर अस्पतालमा कोरोना संक्रमित बिरामीका लागि बेड तथा अक्सिजन शुल्क निःशुल्क गरिने भएको छ । अस्पतालका अध्यक्ष तथा गल्याङ नगरपालिका प्रमुख भूपराज अधिकारीको अध्यक्षतामा बसेको बैठकले अस्पतालमा बेड तथा अक्सिजन शुल्क नलिने निर्णय गरेको हो ।
यसअघि बेड, अक्सिजन तथा औषधीका लागि नगर अस्पतालमा ५ हजार रुपैयाँ शुल्क लिने गरिएको थियो । नगर अस्पतालमा विपन्न परिवारका व्यक्तिसमेत जाने गरेकाले शुल्क लिएको गुनासो आएपछि नगरप्रमुखले शुल्क नलिने प्रस्ताव गरेका हुन् ।
गल्याङ नगरपालिकाद्वारा सञ्चालित गल्याङ नगर अस्पतालमा अन्य रोगसँगै कोभिड–१९ प्रभावित बिरामीको पनि उपचार हुँदै आएको छ ।
१ असारदेखि भर्ना सञ्चालन गर्न गल्याङको सूचना
स्याङ्जाको गल्याङ नगरपालिकाले वार्षिक परीक्षा तथा नतिजा प्रकाशन गर्न सूचना जारी गरेको छ ।
नगरपालिकाको शिक्षा, युवा तथा खेलकुद शाखा प्रमुख उपसचिव केदारराज आचार्यले आइतबार जारी गरेको सूचनामा वार्षिक परीक्षा तथा नतिजा प्रकाशन गरी १ असारदेखि भर्ना प्रक्रिया सञ्चालन गर्न भनिएको हो ।
सूचनामा सम्भव भएसम्म अनुकूल मूल्यांकन प्रक्रिया अपनाएर अनलाइन तथा भर्चुअल माध्यमबाट वा अन्य वैकल्पिक माध्यमबाट परीक्षा सञ्चालन गर्न निर्देशन दिइएको छ ।
सूचनामा त्रैमासिक परीक्षा, अर्धवार्षिक परीक्षा वा निरन्तर मूल्यांकनलाई आधार मानेर वार्षिक नतिजा प्रकाशन गर्न सकिने छ ।
यस्तै, नतिजा प्रकाशनका लागि शिक्षकले एकअर्कामा विद्यार्थीका प्राप्तांक आदानप्रदान गर्दा विद्युतीय माध्यमको प्रयोग गर्ने तथा नतिजा प्रकाशन पनि विद्युतीय माध्यमबाटै गर्न भनिएको छ । यसैगरी शैक्षिक सत्र २०७८ को भर्नासम्बन्धी कार्यक्रम पनि १ असारदेखि विद्युतीय माध्यमबाटै गर्न सूचनामा उल्लेख गरिएको छ ।