इलाम– जिल्ला सदरमुकामका अस्पतालमा स्वाथ्यकर्मीको अभावले उपचारमा समस्या झेलिरहेको बेला इलामको रोङ गाउँपालिकाले गाउँमै कोरोना भाइरसको उपचार गरिरहेको छ । 

मेडिकल अधिकृत सहितको टोलीले इलामको रोङ गाउँपालिकाले गाउँमै कोरोना भाइरस (कोभिड–१९) संक्रमितको उपचार गर्दै आएको छ । पालिकाले कोभिड अस्पताल सञ्चालन गर्दै संक्रमितको उपचार गरिरहेको प्रमुख प्रशासकीय अधिकृत प्रयास भट्टराईले जनाकारी गराए ।

कोभिड पोजेटिभको निःशुल्क उपचार गराइरहेको अस्पतालमा पोजेटिभ भएपछि होम आइसोलेन बस्न नसक्ने बिरामी आउने गरेका छन् । अस्पतालमा भर्ना भएका बिरामी र बिरामीका कुरूवालाई निःशुल्क खाना समेत पालिकाले खुवाउने व्यवस्था गरेको छ ।

गाउँमै कोभिडको उपचारले शुरूवातको अवस्थामै टाढाको अस्पतालमा जानु पर्ने समस्या हटेको छ । स्थानीय नगरिकलाई उपचारमा सहयोग पुगेकोले वडा अध्यक्ष मात्रिका बरालले बताए । उनले उपचार सेवाले उपचार खर्चको अभावमा कोभिडको उपचारमा गाउँपालिकाले सहयोग गरेको जानकारी गराए ।

‘गाउँपालिकाका अधिकांश कोभिडको बिरामी हामीले होम आइसोलेनमा राखेर नियमित स्थाथ्यकर्मीको निगरानी औषधोपचार गराएर निको बनाएका छौं,’ वडा अध्यक्ष बरालले भने, ‘बिमारीको उपचार पालिकाको डाक्टरको निगरानीमा गराई रहेका छौं । डाक्टरकै सल्लाहमा मात्रै रेफर गरिरहेको छौं ।’  

मेडिकल अधिकृत (एमबिबिएस डाक्टर) सहितको उपचार सेवा थालेको अस्पतालमा ल्याब सहितको सेवा उपलब्ध छ । दुई स्टाफ नर्स र एक कार्यालय सहयोगीको साथमा दैनिक कोभिडका बिरामीको उपचार भइरहेको छ । 

गाउँपालिकाको वडा नम्बर ५ इरौटारमा रहेको अस्पतालमा ३० बेड मध्ये १० बेड अक्सिजन सिलिन्डर सहितको तयारी अवस्थामा छ । दुई थान अक्सिजन कन्सन्टेटर, ल्याब मेसिन छन् । तत्कालै सावरी साधनको आवश्यकता पुरा गर्न गाउँपालिकाले ढुवानीका लागि खरिद गरेको गाडीलाई अस्थायी एम्बुलेन्सको रूपमा तयारी राखेको छ ।

गाउँपालिकाले गत वर्ष नै कोभिडको महामारीमा गाउँपालिकामै अस्पताल निर्माण गर्न संघीय सरकारले दिएको दश लाख खर्चलाई गाउँपालिकाले सदुपयोग गर्दै अस्पताल निर्माण गरेको बताइएको छ । अस्पताल निर्माण गर्न पुरानो खाली भएको स्वाथ्य चौकीको भवन र वडा कार्यालयको तल्लो तलालाई उपयोग गरिएको छ । 

सोही ठाउँमा अस्पतालका लागि पर्याप्त जग्गा समेत उपलब्ध भइसकेकोले आवश्यक बजेट उपलब्ध भए सुविधा सम्पन्न अस्पतालको निर्माण थाल्ने गाउँपालिकाले जनाएको छ ।