गोरखा– भिमसेनथापा गाउँपालिकाले पालिकाको अत्यावश्यक पुर्वाधार निर्माणका लागि जग्गा दान गर्न स्थानीयलाई आह्वान गरेको छ । पालिकाको स्वामित्वमा जग्गा नभएकाले पूर्वाधार निर्माणका काम रोकिएपछि नि:शुल्क जग्गा उपलब्ध गराउन बिहीबार र एक सूचना जारी गर्दै आग्रह गरेको हो ।
पालिकाभित्र हेलिप्याड, बसपार्क, पानी, खेलमैदान, समाधिस्थल र ल्याण्ड फिल्ड साइड निर्माण लगायतका निर्माण कार्यका लागि गाउँपालिकाले जग्गादान खोजेको हो । सार्वजनिक जग्गाको रुपमा पालिकामा वनको जग्गा मात्र रहेको गाउँपालिकाका अध्यक्ष लोक प्रसाद बन्जारा (अक्कल)ले बताए । कानुनतः वनको जग्गा स्थानीय सरकारले उपभोग गर्न नपाउने व्यवस्था भएकाले समस्या रहेको उनले बताए । उनले भने, ‘एउटा खानेपानीको ट्यांकी बनाउन, हेलिप्याड बनाउन पनि हामीसँग जग्गा छैन । विकासका लागि जग्गा बाधक बनिरहेको छ ।’
गाउँपालिकाले जग्गाको वर्गीकरण भने गरिरहेको उनले बताए । पालिकासँग भएको जग्गामा पनि वनको स्वामित्व पर्ने विवाद परिरहने भएकाले प्रयोगमा समस्या भएको छ । विकासका लागि ल्याण्ड पुलिङ गर्न खोजेको र त्यसका लागि पनि जनताको सहयोग खासै नभएकाले योजना असफल भएको उनले सुनाए ।
स्थानीय स्तरमा विकास गर्न जग्गा दान नै गर्नुपर्ने अवस्था आएकाले जग्गा दानको लागि गाउँपालिकाले आह्वान गरेको अध्यक्ष बन्जराले पालिकाखबरसँग बताए । ‘अब जहाँ जग्गा उपलब्ध हुन्छ । त्यहीँ विकास गछौँ ।’ उनले थपे, ‘पालिकाका सबै वडामा कम्तिमा एउटा बसपार्क चाहिन्छ । मोटर हिँड्ने बाटो छ तर पालिकामा बसपार्क नै छैन ।’
गत आर्थिक वर्षसम्म गाउँपालिकाले जग्गा खरिद गरेर विकासका काम सञ्चालन गरेको थियो । तर चालु आर्थिक वर्षमा नेपाल सरकारले बजेट अभावको कारण देखाउँदै जग्गा खरिद गरेर विकास निर्माणका कार्य सञ्चालन गर्न नमिल्ने नीति लिएपछि थप समस्यामा परेको उनले बताए ।
उनले भने, ‘पहिला पालिकाले जग्गा किनेर प्रशासकीय भवन, अस्पताल, खेलमैदान बनाएका थिए । हामीले पनि तीन रोपनी जग्गा किनेर प्रशासकीय भवन बनाएका हौँ ।’