चैत ०६, २०७७
भक्तपुर– भक्तपुरको सूर्यविनायक नगरपालिकाले मेलमिलापसम्बन्धी उच्च तहको तालिम दिएको छ । सूर्यविनायक नगरपालिका र न्यायिक समितिको आयोजनामा प्राकृतिक स्रोत द्वन्द्व रुपान्तरण केन्द्रको सहकार्यमा ५ दिने तालिम सम्पन्न भएको हो ।
नगरपालिकाले वडा स्तरमा मेलमिलाप केन्द्र स्थापना गर्ने उद्देश्यले १७ जना मेलमिलापकर्तालाई उच्च तहको तालिम दिएको हो । तालिम लिएका मेलमिलापकर्तालाई वडा तथा नगर स्तरमा आएका विवाद मेलमिलाप गराउन खटाइने नगरपालिकाले जनाएको छ ।
नगर उपप्रमुख तथा न्यायिक समितिका संयोजक जुना बस्नेतले हालसम्म ७४ जनालाई मेलमिलापसम्बधी सामान्य तालिम दिए पनि त्यसले अपुग भएपछि सोही समूहका १७ जनालाई उच्च तहको तालिम दिइएको बताइन् ।
‘हामीले वडा नम्बर ९ र १० मा वडा स्तरीय मेलमिलाप केन्द्र स्थापना गरिसकेका छौँ,’ उनले भनिन्, ‘अबको १ महिनाभित्र सबै वडा तथा नगरपालिकामा समेत मेलमिलाप केन्द्र स्थापना गर्नेछौँ । यसले मेलमिलाप गर्न सहयोग पुग्नेछ ।’
सानो कुरामा विवाद भई ठूलो रूप लिने भएकाले त्यसलाई समयमै सल्ट्याउन आवश्यक रहेको प्रमुख प्रशिक्षक तथा केन्द्रका अध्यक्ष चुपबहादुर थापाले बताए । ५ दिने तालिममा मेलमिलापकर्तालाई फाटेको मनलाई सिउने विधिसम्बन्धी आवश्यक जानकारी दिएको उनको भनाइ ।
विगत समय आफ्नो खुसीले मेलमिलाप गरे पनि अबका दिनमा द्विपक्षीय विवादको विषयलाई जरोमै पुगेर मेलमिलाप गर्ने दाबी सहभागीले गरे । ‘हिजो हामीले विवादको विषयलाई मात्र मिलाउँथ्यौँ,’ मेलमिलापकर्ता आस्था शिवाकोटीले भनिन्, ‘अब विवाद मात्रै होइन, उनेको, फाटेको मनलाई पनि सिलाउनेछौँ । यो हामीले तालिमबाट सिकेका छौँ ।’
फागुन २८, २०८०
फागुन २७, २०८०
फागुन २१, २०८०
कात्तिक १४, २०८१
