मोरङ– संघ प्रदेश होस् या स्थानीय तहको चुनाव । जुनसुकै चुनावमा उठ्ने ठूला पार्टीका हुन् या साना । उम्मेदवारले चुनावका बेला आफ्नो ठाउँलाई स्वर्ग बनाइदिने घोषणा गर्छन् ।
तर, चुनाव जितेर निर्णय गर्ने तहमा पुगेपछि उनीहरूको नाकमुखै देखिँदैन । जनतासँग गरेका प्रतिबद्धता अर्को चुनावममा पनि दोहोरिन्छन् ।
अझ ठूला पदमा पुगेका नेता तथा सांसदको क्षेत्रमा खोलामा पुल नबन्दा कष्टकर जीवन जिउन बाध्य छन्, नागरिक । यस्तै, दुःखकष्ट भोगिरहेका छन्, सविधानसभाका पूर्वअध्यक्ष तथा नेकपा एमाले नेता सुवास नेम्बाङको निर्वाचन क्षेत्रका जनताले । खोलामा पुल नबन्दा उनीहरू समस्यामा छन् ।
इलामको चुलाचुली र मोरङको मिक्लाजुङ गाउँपालिको सीमामा रहेको नुनसरी खोलामा पुल नबन्दा दैनिक सास्ती खेप्नु परेको स्थानीय बताउँछन् । उक्त खोलाले इलाम र मोरङलाई छुट्याउँछ ।
मोरङको क्षेत्र नम्बर १ र इलामको क्षेत्र नम्बर २ मा पर्छ, यो ठाउँ । मोरङ क्षेत्र नम्बर १ का संघीय सांसद घनश्याम खतिवडा हुन् भने इलाम क्षेत्र नम्बर २ का सुवास नेम्बाङ ।
चुनावताका नुनसरी खोलामा पक्की पुल बनाइदिने नेम्बाङको घोषणा अहिलेसम्म कार्यान्वयनमा गएन । स्थानीयलाई आउजाउ गर्न एउटा झोलुंगे पुल निर्माण गरीएको छ ।
अहिले सोही झोलुंगेबाट मोटरसाइकलमा खाद्यान्न ओसार्ने गरिन्छ । कृषकको उत्पादनसमेत बजार पु¥याउन समस्या हुने गरेको स्थानीयको गुनासो छ ।
‘बर्खाको समय खोला बढेपछि खाद्यान्नसमेत अभाव हुने गरेको छ । खाद्यान्न पनि बाइकबाटै बोकेर खानुपर्छ’, स्थानीय इन्दिरा कटवालले भनिन्, ‘हामीले उत्पादन गरेका कृषिजन्य वस्तु बजार पुर्याउनै समस्या छ ।’
मोरङ सुगम जिल्लाको रूपमा चिनिन्छ । प्रदेशको राजधानी भएको तथा २ पटक संविधानसभा अध्यक्ष भएको जिल्लाको अवस्था भने दयनीय छ । हिउँदमा झोलुंगे पुलको मुनाबाट ठूला सवारीसाधन वारपार गरे पनि बर्खामा भने सवारीका साथ वारिबाट पारि जान सक्दैनन् ।
चारैतर्फ पहाड, मनोरम झर्ना र राजारानीका मूर्ति, बुद्धटार यहाँका विशेषता हुन् । माओवादीको १० वर्षे युद्धका बेला २०५८ मा राजा वीरेन्द्रको वंश विनास भएसँगै कुइनेटारमा राजारानीको प्रतिमा फेला परेको जनविश्वास छ ।
सीमा जोडिएका मोरङको मिक्लाजुङका अध्यक्ष देवीप्रसाद आचार्यले खोलाको तल्लो क्षेत्रमा एउटा पुल रहेको र अर्को नजिकैको खोलामा निर्माण हुँदै गरेको बताए ।