काठमाडौं– नेपाली कांग्रेसको १४औँ महाधिवेशनअन्तर्गत देशभरबाट तीन हजार पाँच सयभन्दा बढी महाधिवेशन प्रतिनिधि चयन भएका छन् । महाधिवेशन सुरु हुन दुई साता अघिसम्म तीन हजार ५१० जना महाधिवेशन प्रतिनिधि चयन भएका हुन् । पार्टीको केन्द्रीय निर्वाचन समितिका सचिव तथा अधिवक्ता जगन्नाथ श्रेष्ठले १६५ निर्वाचन क्षेत्रमध्ये हालसम्म १३५ वटा निर्वाचन क्षेत्रबाट महाधिवेशन प्रतिनिधिको टुङ्गो लागेको जानकारी दिए ।

कांग्रेसको विधानअनुसार, हरेक निर्वाचन क्षेत्रबाट क्षेत्रीय प्रतिनिधिले आफूहरू मध्येबाट निर्वाचित गरेका २५ जना महाधिवेशन प्रतिनिधि र एक जना क्षेत्रीय सभापति गरेर २६ जना महाधिवेशनमा चुनिने प्रावधान छ । सचिव श्रेष्ठले अब ३० वटा निर्वाचन क्षेत्रबाट महाधिवेशन प्रतिनिधि चयन हुन बाँकी रहेको जानकारी दिनुभयो । ती क्षेत्रबाट महाधिवेशन प्रतिनिधि र क्षेत्रीय सभापतिमा २६ जनाको दरले ७८० जना महाधिवेशन प्रतिनिधि चयन हुन बाँकी छ ।

महाधिवेशनमा यस पटक १६५ वटा निर्वाचन क्षेत्रबाट २६ जनाका दरले चार हजार २९० जना महाधिवेशन प्रतिनिधि चयन हुनेछन् । हालका केन्द्रीय कार्यसमितिका पदाधिकारी र केन्द्रीय सदस्य स्वतः महाधिवेशन प्रतिनिधि हुने प्रावधान छ । महाधिवेशन प्रतिनिधिले पार्टीका पदाधिकारी र केन्द्रीय सदस्य चयन गर्ने प्रावधान विधानमा छ । यस अतिरिक्त पार्टीको भ्रातृ तथा शुभेच्छुक संस्था र विदेशस्थित जनसम्पर्क समितिबाट पनि महाधिवेशनमा प्रतिनिधित्व हुने व्यवस्था छ ।

केन्द्रीय निर्वाचन समितिका अनुसार, बर्दिया, बाँके, सप्तरी, सिरहामा बिहीबार क्षेत्रीय अधिवेशन गर्ने कार्यतालिका छ । सिन्धुपाल्चोक, धनुषा र महोत्तरीमा प्रदेश अधिवेशन प्रक्रिया सुरु गरिएको छ । रसुवा, दार्चुला, धनकुटामा अधिवेशन प्रक्रिया सुरु गरिएको छ ।

सर्लाहीमा महाधिवेशन प्रक्रिया अघि बढाउन पार्टीले बुधबार मात्रै निर्वाचन अधिकृत खटाएको छ । ढिलामा मङ्सिर १० गतेसम्म क्षेत्रीय अधिवेशन सक्न केन्द्रले निर्देश गरेको छ । पार्टीले आगामी मङ्सिर १६ र १७ गते सातवटै निर्वाचन क्षेत्रमा प्रदेश अधिवेशन राखेकाले त्यसअघि अधिवेशन नगर्ने जिल्लाले प्रदेश अधिवेशनमा सहभागिता जनाउन सक्ने छैनन् ।