कैलाली– नेकपा एमालेले गोदावरी नगर अधिवेशन उद्घाटन गरेको ४ महिना पुगिसकेको छ । १५ कात्तिकमा एमालेले नगर अधिवेशन उद्घाटन गरेको थियो । तर, हालसम्म नेतृत्वका लागि सहमति नहुँदा नगर अध्यक्ष चुन्न सकेको छैन । गोदावरी नगरपालिकाको नयाँ नेतृत्व चयनका लागि पहिलो नगर अधिवेशन उद्घाटन गरिए पनि त्यसको ४ महिला बितिसक्दासम्म नगर कमिटीको टुंगो लाग्न सकेको छैन ।

नगर कमिटी अध्यक्षका लागि वर्तमान अध्यक्ष गोकर्ण भट्ट र सचिव आनन्द भट्टले दाबी गरेका थिए । तर, दुवैबीच सहमति हुन नसक्दा लामो समय बितिसक्दा पनि अध्यक्षको टुंगो लाग्न नसकेको हो । अध्यक्ष भट्ट पूर्वमाओवादी खेमाका हुन् भने सचिव भट्ट पूर्वएमाले खेमाका हुन् ।

नेकपा विभाजन हुनुपूर्व गोकर्ण भट्ट अध्यक्ष र आनन्द भट्ट सचिव थिए । पछि नेकपा विभाजन भएपछि पूर्वमाओवादी खेमाका गोकर्ण भट्ट लेखराज भट्टसँगै एमालेमै रहे । सोही कारण तत्काल एमाले गोदावरी नगरको अध्यक्षमा गोकर्ण भट्टले नै निरन्तरता पाएका थिए । नेकपा विभाजन भएपछि गोदावरीमा एमालेभित्र पूर्वमाओवादी खेमाको बलियो उपस्थिति छ ।

केन्द्रमा लेखराज भट्ट पार्टीको १०औँ महाधिवेशनबाट सचिव पदमा निर्वाचित भएपछि उनकै गृहनगरमा भने पूर्वमाओवादी र पूर्वएमाले खेमा विभाजन हुँदा त्यसको असर नगर कमिटी चयनमा परेको हो । हालै सम्मन्न कैलाली जिल्ला अधिवेशनमा पनि दुई खेमा विभाजन भएर चुनावमा गएपछि त्यसले झन् दुरी बढाएको छ । त्यसले पनि गोदावरीको नगर कमिटी चयन गर्न झनै सकस परेको छ ।

नगर सचिव भट्ट अध्यक्षमा विवाद नभएर प्राविधिक कारणले ढिलाइ भएको बताउँछन् । नगर अधिवेशनपछि केन्द्रीय अधिवेशन र त्यसपछि जिल्ला अधिवेशन गर्नुपर्ने भएकाले ढिलाइ भएको उनको भनाइ छ । अब २० माघभित्रै नगर कमिटी चुन्ने गरी तयारी थालिएको उनले जानकारी दिए ।

नगर अध्यक्षका लागि २ जना मात्रै नभएर अरू पनि योग्य व्यक्ति भएकाले छलफलबाट नेतृत्व चयन गरिने उनको भनाइ छ । सचिव भट्टले छलफलबाट अध्यक्ष टुंग्याउने भने पनि बिहीबार गोकर्ण भट्टको अध्यक्षतामा एमाले गोदावरीको नगर कमिटी चयन गर्न माग गर्दै एमालेका ११ वडाध्यक्षले जिल्ला अध्यक्ष रतन थापालाई ज्ञापनपत्र बुझाएका छन् ।

उनीहरूले नगर कमिटी अध्यक्ष नतोकिँदा नगरमा पार्टीका काम प्रभावित भएको भन्दै छिटोभन्दा छिटो गोकर्ण भट्टलाई नै अध्यक्ष बनाउन माग गरेका छन् । ज्ञापनपत्रमा एमाले गोदावरी नगरपालिका वडा नम्बर २ का अध्यक्ष डम्बर साउद, ३ का अध्यक्ष वीरेन्द्र अवस्थी, ४ का अध्यक्ष रवीन्द्र रोकामगर, ५ का अध्यक्ष सुहिराम चौधरी, ६ का अध्यक्ष सन्तोष सिंह, ७ का अध्यक्ष कलावती साउद, ८ का अध्यक्ष गोविन्द चौधरी, ९ का अध्यक्ष सर्जन ठकुल्ला, १० का अध्यक्ष झंकर कोली, ११ का अध्यक्ष लोकबहादुर कोली र १२ का अध्यक्ष नन्द विकले हस्ताक्षर गरेका छन् । विवादकै बीच वडाअध्यक्षले नै एक जनालाई अध्यक्ष बनाउन माग गर्दै ज्ञापन बुझाएपछि पार्टीमा झन् किचलो थपिएको छ ।

वडामा पनि किचलो
गोदावरीका ११ वडामा कात्तिकमै वडा अधिवेशन सम्पन भए पनि वडा नम्बर १ मा हालसम्म विवाद टुंगिन सकेको छैन । वडामा अध्यक्षका लागि गणेश महरा र महावीर विकले आ–आफ्नो दाबी छाडेका छैनन् ।

वडा नम्बर १ मा यसअघि एकपक्षीय भेलाबाट २२ कात्तिकमा गणेश महराको अध्यक्षतामा वडा कमिटी चयन गरिएको थियो । पछि विवाद आएपछि उक्त भेलाको निर्णय पनि कार्यान्वयनमा आउन सकेको छैन ।