काठमाडौं । रुपन्देहीका प्रभावशाली बामपन्थी नेता घनश्याम भुसाल हाल नेकपा एमालेमा छैनन् ।
आसन्न प्रतिनिधिसभा निर्वाचनमा एमालेले टिकट नदिएको झोंकमा उनी सत्ता गठबन्धनको साथ लिएर रुपन्देही–१ मा स्वतन्त्र बाम उम्मेदवारका रुपमा चुनावी मैदानमा छन् ।
यो निर्वाचनमा क्षेत्रमा उनकै राजनीतिक चेला छविलाल विश्वकर्मालाई हराउनुपर्ने चुनौती भुसालसामु छ । एमालेका सचिवसमेत रहेका विश्वकर्मालाई भुसालको इमान्दारिताको राजनीतिक विरासतलाई तोड्न सहज भने छैन ।
त्यसमाथि सत्तारुढ बामलोकतान्त्रिक गठबन्धन र एमालेसँग रुष्ट कार्यकर्ताको साथ पाउँदा भुसाल निकै शक्तिशाली उम्मेदवारका रुपमा देखा परेका छन् ।
हुन त विश्वकर्मालाई राप्रपा र जसपाले साथ दिएका छन् । तर, त्यो साथले मात्रै जित हात पार्छु भन्ने कुरामा उनी ढुक्क हुन सकेका छैनन् । अध्यक्ष केपी शर्मा ओलीको कोपोभाजनमा परेर टिकटको दौडबाट बाहिरिएका भुसालले एमाले परित्याग गरेसँगै रुपन्देही केही प्रभावशाली एमाले नेताहरू समेत उनको पक्षमा खुलेका छन् ।
यसले गृह क्षेत्रबाट चुनावी मैदानमा उत्रिएका भुसालको जित केही सहज बन्न सक्छ । रुपन्देही–१ मा १ लाख ३९ हजार ५ सय ६० मतदाता छन् ।
गत स्थानीय चुनावको मतलाई आधार मान्दा भुसालभन्दा विश्वकर्मा अगाडि देखिन्छन् । तर, उमालेले त्यो मत पाउँदा भुसाल समेत एमालेका स्थायी समिति सदस्य थिए । यो क्षेत्रमा नेपाली कांग्रेस, माओवादी केन्द्र, नेकपा एकीकृत समाजवादी, जनमोर्चा, लोसपा र राष्ट्रिय जनमुक्ति पार्टीको मत जोड्दा करिब ४० हजार छ ।
यसैगरी नेकपा एमाले, राप्रपा र जसपाको मत करिब ५२ हजार छ । त्यसबाहेक अहिले सात हजार मतदाता थपिएका छन् । उता देवदहका तत्कालीन अध्यक्ष रहेका टीकाराम चापागाईँले समेत स्वतन्त्र उम्मेदवारी दिएका छन् ।
उनी दुवै गठबन्धनको मत आफूले तान्ने दाबी गर्छन् । उता स्थानीय तहको मतलाई आधार मानेर आगामी चुनावको हिसाबकिताब गर्न नमिल्ने तर्क भुसालको छ ।
उनको भनाइअनुसार स्थानीय तहको निर्वाचन हुँदा र अहिलेको अवस्थामा राष्ट्रिय राजनीतिमा निकै परिवर्तन पनि आएको छ । उनका प्रतिस्पर्धी एमालेका विश्वकर्मा भने गठबन्धनभन्दा करिब १५ हजार बढी मतले ल्याएर विजयी हुने दाबी गर्छन् ।
यस क्षेत्रमा तेस्रो र चौथो शक्तिका रूपमा राप्रपा र जसपा छन् । तर, गठबन्धनको मत जोगाउँदै रुष्ट एमाले मतदातालाई समेत रिझाउन सकेको खण्डमा भुसालले स्मरणीय जित हासिल गर्ने अनुमान बलियो बन्दै गएको छ ।