नेपाल स्टक एक्सचेन्जको कारोबार प्रणालीमा आएको समस्याका कारण थपिएको समयमा समेत कारोबारको अन्तिम दिन बिहीबार सेयर कारोबार मापक नेप्से परिसूचक दोहोरो अंकले बढेको छ ।

११ बजे कारोबार खुलेदेखि नै प्रणालीमा समस्या देखिएको थियो । लगानीकर्ताले सेयर खरिद तथा बिक्रीका लागि कुनै अर्डर गर्न नपाएको तथा धितोपत्र दलाल कम्पनीसँगको सम्पर्क सञ्जालमा समस्या आएको थियो । 

कारोबार समय ३ बजेसम्म रहे पनि समस्या समाधानपछि नेप्सेले समय थप गरी ५ बजेसम्म पु-याएको थियो । सो अवधिका कारोबार मापक नेप्सेमा दोहोरो अंक अर्थात् १२.४९ ले वृद्धि भई १ हजार ५२०.६९ मा पुगेको छ ।

यस्तै, सेन्सेटिभ परिसूचक १.७१ ले वृद्धि भई ३०१.३८ मा पुगेको छ । कुल १ सय ८९ कम्पनीको ४२ लाख ६२ हजार ६ सय ९८ कित्ता सेयर २ अर्ब १७ करोड ६८ हजार २ सय ८३ मूल्यमा खरिद बिक्री भए । 

कारोबार भएका कुल १२ उपसमूहमध्ये बिहीबार तीन उपसमूहको सेयर ओरालो लाग्दा ९ उपसमूहको सेयर भने वृद्धि भएको छ । 

व्यापार ३०.२१, होटल १.१३ र सामूहिक लगानी कोष ०.०२ बिन्दुले ओरालो लागे । यस्तै, बैंकिङ ३.८३, विकास बैंक १५.७, जलविद्युत् २.३१, वित्त २.२४, निर्जीवन बिमा ३०२.०२, उत्पादन ३३.२२, अन्य ०.३९, लघुवित्त ३३.७३ र जीवन बीमा २०४.५३ ले वृद्धि भएको छ ।

नेप्सेका अनुसार आज पनि कारोबारका आधारमा नेपाल पुनर्बिमा कम्पनी नै शीर्ष स्थानमा रहेको छ । प्रतिकित्ता ८ सय ९५ रुपैयाँमा १७ करोड २१ लाख ७२ हजार ११६ को कारोबार भई सो कम्पनी शीर्ष स्थानमा रह्यो ।

यस्तै, नागरिक लगानी कोष ९ करोड २३ लाख २४ हजार ६ सय ८७, नेपाल लाइफ इन्स्योरेन्स कम्पनी ९ करोड १ लाख ३१ हजार ९ सय ४६, सूर्या लाइफ इन्स्योरेन्स कम्पनी ८ करोड ५९ लाख ५७ हजार १ सय ३३, एभरेष्ट इन्स्योरेन्स कम्पनी ८ करोड ४३ लाख ९१ हजार ३ सय ४ र शिवम् सिमेन्ट ७ करोड ९ लाख ८६ हजार १ सय ३६ बराबरको कारोबार भई शीर्ष स्थानमा रहे । 

यस्तै, राष्ट्रिय बिमा कम्पनी र सोही कम्पनीका संस्थापक लगानीकर्ताले समान रुपमा ९.९९ प्रतिशतले कमाउँदा रिलायन्स लाइफ इन्स्योरेन्स ९.८९, एनआरएन इन्फ्रास्ट्रक्चर ९.८९, एनआरएन लघुवित्त ९.१४, एभरेष्ट इन्स्योरेन्स कम्पनी ८.१३ र नेपाल फाइनान्स कम्पनीका लगानकीर्ताले ७.५६ प्रतिशतले कमाए । 

यस्तै, नबिल इक्विटी फन्ड ५.६४, आशा लघुवित्त ४.१३, साल्ट ट्रेडिङ कर्पोरेसन ३.५८, युनियन हाइड्रोपावर २.९४ र मल्टीपर्पस फिनान्स कम्पनीका लगानीकर्ताले २.७० प्रतिशतले गुमाए ।