दैलेख– रोजगारीका निम्ति युवाहरू विदेशिन बाध्य भएका बेला विकासमा युवाहरूलाई परिचालन गरी गाउँमै रोजगारी दिने महावु गाउँपालिकाले योजना बनाएको छ । 

कृषि, पशुपालनसँगै गाउँ र वडामा हुने सबै विकासका कार्यमा अनिवार्य रूपमा युवाहरूलाई परिचालन गर्ने रणनीति तयार गरेर काम सुरु गरिएको गाउँपालिकाका अध्यक्ष जंगबहादुर शाहीले बताए । सीप, क्षमता र योग्यताका आधारमा पालिकामा आएका युवाहरूलाई गाउँपालिकाले रोजगारी दिँदै आएको उनको भनाइ छ । 

उनले अध्यक्ष रोजगार कार्यक्रमसँगै प्रधानमन्त्री र मुख्यमन्त्री रोजगार कार्यक्रमलाई समेत प्रभावकारी रूपमा कार्यान्वयन गरेर युवालाई गाउँमै रोक्ने तयारी थालिएको बताए । 

कोरोना खर्च २ करोड ७६ लाख

कर्णाली प्रदेशकै पहिलो कोरोना संक्रमित जिल्ला हो दैलेख । कोरोना कहरमा सबैभन्दा धेरै युवाहरू दैलेखको महावु गाउँपालिकामा आएका छन् । पालिकाभर आएका दुई हजार ७०० युवाहरूलाई गाउँमै रोजगारी दिनेबारेमा कार्यपालिकामा छलफल भएर काम सुरु गरिएको बताइएको छ । 

महावु गाउँपालिकाले कोरोना भाइरस (कोभिड– १९)को रोकथाम तथा नियन्त्रणका लागि पालिकामा दुई करोड ७६ लाख रुपैयाँ रकम खर्च गरेको जानकारी दिएको छ । स्वास्थ्य शाखा प्रमुख रमेश दसौदीले विदेशबाट आएका युवाहरूलाई ल्याउनका लागि मात्र यातायात, क्वारेन्टाइन व्यवस्थापन, खाना खर्च, सामग्री खरिद, औषधि खरिदलगायत विभिन्न शीर्षकहरूमा उक्त रकम खर्च भएको जानकारी दिए । 

आएकामध्ये एक हजार ३९५ जनाको पीसीआर जाँच गरिएको र एक हजार ३७५ जनाको आरडीटी जाँच गरिएको छ । पालिकाभर कोरोना संक्रमितको संख्या १८९ जना रहेको भए पनि अहिले पालिकामा कुनै पनि संक्रमित बिरामीहरू नदेखिएको र विस्तारै पालिका कोरोनामुक्त हुने तयारीमा रहेको जानकारी उनले दिए । 

विभिन्न शीर्षकहरूमा भएको खर्च रकममध्ये पूरै भुक्तानी दिन नसकिएको र केही रकम उधारो रहेको गाउँपालिकाका प्रमुख प्रशासकीय अधिकृत भक्तबहादुर मल्लले जानकारी दिए । यस आर्थिक वर्षमा पनि कोरोनाको खर्चको हिसाब आउन बाँकी       रहेको र पहिलो चौमासिक अवधिमा खर्चको जानकारी गराउने मल्लको भनाइ छ । 

जनताको जीवन सुरक्षा गर्नु पालिकाको पहिलो कर्तव्य भएको र पालिकाका सबै निर्वाचित जनप्रतिनिधिहरूले आफ्ना वडावडामा जनतालाई कोरोना संक्रमणबाट जोगाउनका लागि वडाका विद्यालय, खुला चौरलगायतका विभिन्न स्थानहरूमा क्वारेन्टाइन निर्माण गरेर जसोतसो विदेशबाट आएका मानिसहरूलाई सुरक्षित राख्ने प्रयास गरेको पालिकाले जनाएको छ ।

पालिकाले उपचार सेवा प्रभावकारी बनाउन पालिकामै २५ लाख रुपैयाँको अत्याधुनिक आइसोलेसन अस्पताल निर्माण गरेर सञ्चालनमा ल्याएको छ । कोरोना संक्रमित मात्र नभएर अन्य बिरामीहरूका लागि पनि अस्पताल प्रयोगमा आएको अध्यक्ष जंगबहादुर शाहीले बताए । 

सार्वजनिक सुनुवाइ गराउने पहिलो गाउँपालिका महावु

स्थानीय तहमा सार्वजनिक सुनुवाइ गर्न आनाकानी गर्ने र बिल, भौचर मिलाएर खाने बानी परेका बेला महावु गाउँपालिकाले सार्वजनिक सुनवाइ गरेको छ । 

दैलेखमै पहिलो सार्वजनिक सुनुवाइ गर्ने महावु गाउँपालिकाले आर्थिक वर्ष २०७६/०७७ मा सम्पन्न गरेका विकास गतिविधिहरू र कोरोना कहरमा पालिकाले गरेको खर्चलगायत सेवा प्रवाहको विषयमा सार्वजनिक सुनुवाइ गरिसकेको छ । 

गाउँपालिकाले विकास निर्माणलगायत विभिन्न शीर्षकमा भएको खर्चको पूर्ण विवरण आमनागरिकलाई जानकारी गराउने र खर्च सार्वजनिक गर्ने प्रतिबद्धता गरिएको छ । 

पालिकामा संचालन भएका योजनाहरूलाई थप प्रभावकारी बनाउन र दिगोपन कायम गर्ने, हरेक नागरिकलाई विकासको जानकारी गराउँदै हरेक चौमासिक अवधिमा अनिवार्य रूपमा सार्वजनिक सुनुवाइ सम्पन्न गर्ने, गाउँमा आएका युवाहरूलाई रोजगारी प्रदान गर्न पालिकाले कार्यविधि निर्माण गरेर विकास निर्माण, कृषि र पशुपालनका क्षेत्रमा लगाउने, कृषि उत्पादन बढाउनका लागि सिँचाइ कुलो निर्माणलगायतका कामहरू अगाडि बढाउने साझा प्रतिबद्धता गरिएको छ ।