माघ ११, २०७७
ओखलढुंगा- जिल्ला अस्पताल रुम्जाटारलाई पोर्टेबल (सानो) अक्सिजन कन्सनट्रेटर सहयोगस्वरूप प्रदान गरिएको छ । सिद्धिचरण नगरपालिका वडा नम्बर ११ घर भई हाल बेलायत बस्दै आएका २ परिवारले अक्सिजन कन्सनट्रेटर सहयोग गरेका हुन् ।
नगरपालिकाको वडा नम्बर ११ रामबजारका शिवजी र उर्मिला श्रेष्ठ, भक्तलाल र भेषकुमारी श्रेष्ठ दम्पतीले आफ्ना बुबाआमाको स्मरणमा अक्सिजन कन्सनट्रेटर सहयोग गरेका हुन् ।
कन्सनट्रेटर मेसिनले अटोमेटिक रूपमै अक्सिजन उत्पादन गर्छ । यसले श्वासप्रश्वासका रोगीलाई विशेष सहायता पुग्ने अस्पतालका मेडिकल सुपरिटेन्डेन्ट सन्तोष देवले बताए ।
ठूलो आकारको कन्सनट्रेटर बोकेर हिँड्न नमिल्ने भएकाले हाल सहयोगबापत प्राप्त कन्सनट्रेटर प्रयोग गर्न सहज हुने अस्पतालले जनाएको छ । उक्त उपकरण ८० हजार रुपैयाँ मूल्य बराबरको हो । गाडीको ब्याट्रीबाट चल्ने यो उपकरण एम्बुलेन्समा समेत राख्न सकिनेछ ।
उपकरण हस्तान्तरण कार्यक्रममा जिल्ला समन्वय समितिका अध्यक्ष जयबहादुर श्रेष्ठ, सिद्धिचरण नगरप्रमुख मोहनकुमार श्रेष्ठलगायत उपस्थित थिए । दाताहरूका तर्फबाट शिवजी श्रेष्ठका भाइ केन्द्र श्रेष्ठ र भक्तलालका भाइ विश्व श्रेष्ठले कन्सनट्रेटर हस्तान्तरण गरेका हुन् ।
सिद्धिचरणका नगरप्रमुख श्रेष्ठले अस्पताललाई उपलब्ध गराइएको कन्सनट्रेटरले बिरामीको उपचारमा सहज हुने विश्वास व्यक्त गरे ।
फागुन ३०, २०८०
फागुन २९, २०८०
कात्तिक १४, २०८१
