महोत्तरी– बर्दिबास नगरपालिका वडा नम्बर १४ स्थित सुभम बस्ती जाने गल्ली अलि पर पुगेपछि दायाँतर्फ देखिने एउटा भव्य घरले जोकोहीलाई झसंग बनाउँछ ।घर नजिकै गएपछि भित्र खरानी नै खरानी छ । मानौँ यो मुर्दाघर घर हो, जहाँ दाह संस्कारका लागि यही घर प्रयोग गरिन्छ । अगाडिपट्टि २ वटा सटर छन् । सटरभित्र जलेका बोतल र सिसा यत्रतत्र देखिन्छन् । दिउँसै अँध्यारो र भग्नावेश देखिने यो घर किन यति डरलाग्दो छ ! 

बस्तीको बीचमा पनि यो घर वरपरको लागि किन भूत बनिरहेको छ ? यो घरबाट आउजाउ गर्ने जोकोहीलाई देखेपछि यस्तै विभिन्न प्रश्न उब्जिन्छन् । घरको दायाँबायाँ ठूला अक्षरले लेखिएको छ, यो अपराधीको घर हो । यो घर किनबेच गर्न पाइँदैन । यो लेखेको देखेपछि डरभन्दा ज्यादा मनमा घृणा पैदा हुन्छ ।

बर्दिबास सहरको व्यस्त गल्लीमा एक्लिएको यो भव्य घर अरुण साहको हो, जसले ५ वर्षीया बालिका गुलावसा खातुनको एक वर्षअगाडि बलात्कारपछि हत्या गरेका थिए । अहिले साह जेलमा आजीवन सजाय भोगिरहेका छन् । साहको घर मात्र हैन, उनी हिँड्ने बाटो, उनको परिवारप्रति समाजमा घृणा र आक्रोस चुलिएको छ । एक वर्षअगाडि अर्थात् ०७७ मंसिरमा साहले ५ वर्षीया बालिकालाई यही घरमा हत्या गरेर बोरामा राखी बाहिर फ्याँकेका थिए । सोही बेला बर्दिबासका स्थानीयले यो घरमा आगो लगाइदिए । अभियुक्त साहको घरका सम्पूर्ण सामान ध्वस्त बनाइदिए । त्यसपछि यो घर रित्तो बन्यो, भूतघरजस्तै । झन्डै १० धुर जग्गामा बनेको यो घरको अगाडि र पछाडि अपराधीको घर हो भनेर लेखिएपछि साहसँगै यो घरले पनि सजाय भोगिरहेको छ । किनबेच गर्न पाइँदैन ।

यति ठूलो भव्य महल साहको अपराधका कारण बेवारिसे मात्र बनेको छैन, उनको परिवारका सदस्यसमेत अहिले यहाँबाट विस्थापित भइसकेका छन् । घरको प्रत्येक तलामा स्थानीयले आगजानी गरेको खरानीका थुप्राबाहेक केही छैनन् । साहले घरमा किराना पसल राखेका थिए । सोही पसलमा चक्लेट किन्न गएकी बालिका खातुन एक्कासि हराएकी थिइन् । हराएको ३ दिनपछि घरनजिकै मृतावस्थामा भेटिएको केही घन्टामै प्रहरी हिरासतमा आफैंले मारेको स्वीकारेका थिए, अभियुक्त साहले ।

किराना पसलको नाममा अहिले घरभित्र जलेका बोतल र फलामका टुक्राबाहेक केही छैनन् । वरपर घडेरी पल्टिङ गरिएको छ भने बीचमा एक्लै ठडिएको घरले अपराधको आक्रोस देखाइरहेको छ । करोडौँ रुपैयाँ खर्चिएर बनाइएको यो घर समाजका लागि अपराधको चिह्न बनेको छ । अपराध गर्ने जोकोही कानुनको भागिदार मात्र हैन, सामाजिक आक्रोशको पनि सिकार हुनुपर्छ भन्ने उदाहरण देखाइरहेको छ, यो घर ।

स्थानीयले घरमा आगजानी गर्दा करोडौँको नोक्सानी भयो । साह र उनका परिवारले प्रयोग गर्ने लत्ताकपडा, गरगहना, ओढ्ने, ओछ्याउने, भाँडाकुँडा नष्ट भए । अपराधीलाई समाजले नै सजाय दिन पाउनुपर्ने मागसहित एक वर्षअगाडि बर्दिबास रणभूमिमा परिणत भयो । कयौँ घाइते भए भने स्थानीय सञ्जय न्यौपानेले प्रहरीको गोली लागेर ज्यानै गुमाए ।

बालिकाको निर्मम हत्या मात्र हैन, स्थानीय युवाको मृत्युमा साहप्रतिको घृणा देशैभरि आगो जसरी फैलियो । यसैको निशानामा अहिले साहको जग्गाजमिन र घरसमेत परेको छ ।