काठमाडौं– ३००औँ पृथ्वी जयन्ती तथा राष्ट्रिय एकता दिवस मनाउन नेपाल प्रज्ञा प्रतिष्ठान, नेपाल संगीत तथा नाट्य प्रज्ञा प्रतिष्ठान, नेपाल ललितकला प्रज्ञा प्रतिष्ठान र सांस्कृतिक संस्थानका पदाधिकारी सम्मिलित समिति गठन गरिएको छ । कमलादीस्थित प्रज्ञा प्रतिष्ठानमा आइतबार भएको बैठकमा प्रतिष्ठानका कुलपति गंगाप्रसाद उप्रेतीको संयोजकत्वमा समिति गठन भएको हो ।

समितिमा संगीत तथा नाट्य प्रज्ञा प्रतिष्ठानका कुलपति नारायणभक्त श्रेष्ठ, नेपाल ललितकला प्रज्ञा प्रतिष्ठानका कुलपति कान्छाकुमार कर्माचार्य, तीन वटै प्रज्ञा प्रतिष्ठानका उपकुलपति क्रमशः जगमान गुरुङ, हरिहर शर्मा र गोपाल चित्रकार, संगीत तथा नाट्य प्रज्ञा प्रतिष्ठान र ललितकला प्रज्ञा प्रतिष्ठानका सचिव क्रमशः श्यामप्रकाश तमोट र विपिन घिमिरे एवं सांस्कृतिक संस्थानका अध्यक्ष एवं महाप्रबन्धक क्रमशः प्रेमनाथ अधिकारी र अशोक प्यासी राई सदस्य तथा नेपाल प्रज्ञा प्रतिष्ठानका सचिव प्रा.जगतप्रसाद उपाध्याय सदस्य सचिव रहेको मूल व्यवस्थापन समितिसमेत गठन भएको छ ।

प्रतिष्ठानका अनुसार बैठकले पृथ्वी जयन्ती तथा राष्ट्रिय एकता दिवस अवसरमा ‘पृथ्वीनारायण शाहको नेतृत्वमा सम्पन्न नेपाल राष्ट्रको एकीकरणमा विभिन्न जनसमुदायको सहभागिता’ विषयक विचार–गोष्ठी, पुस्तक प्रदर्शनी, चित्रकला प्रदर्शनी, सांस्कृतिक झाँकीसहितको शोभायात्रा र पृथ्वीनारायण शाहको प्रतिमामा माल्यार्पण एवं सांस्कृतिक कार्यक्रम संयुक्त रूपमा आयोजना गर्ने निर्णय गरेको छ ।

बैठकले कार्यक्रमलाई व्यवस्थित र प्रभावकारी तुल्याउन नेपाल प्रज्ञा उक्त बैठकद्वारा आउँदो २५ पुसमा पुस्तक प्रदर्शनी र चित्रकला प्रदर्शनी, २६ पुसमा विचार गोष्ठी तथा २७ पुस बिहान विभिन्न जातीय सांस्कृतिक झाँकीसहितको शोभायात्रा र पृथ्वीनारायण शाहको प्रतिमामा माल्यार्पण गर्ने कार्यक्रम रहेको छ ।

सोही दिन अपराह्न सांस्कृतिक कार्यक्रम आयोजना गर्ने साथै पुस्तक प्रदर्शनी, विचार गोष्ठी र शोभायात्राको व्यवस्थापन नेपाल प्रज्ञा प्रतिष्ठानले गर्नेछ । चित्रकला प्रदर्शनीको व्यवस्थापन ललितकला प्रज्ञा प्रतिष्ठानले गर्ने एवं सांस्कृतिक कार्यक्रमको व्यवस्थापन संगीत तथा नाट्य प्रज्ञा प्रतिष्ठान र सांस्कृतिक संस्थानले गर्ने निर्णय गरेको छ ।