असार १३, २०७९
बाजुरा ।बाजुराको बुढीनन्दा नगरपालिकाका नगरप्रमुख जनककुमार बोहोराले खाद्यान्न समस्या समाधानका लागि कार्यालय प्रमुखसँग छलफल थालेका छन् ।
नगरप्रमुख बोहोराले नेपाल खाद्य संस्थान डिपो कार्यालय कोल्टी र नुन डिपोका कर्मचारीसँग खाद्यान्न र नुनको अवस्थाबारे छलफल गरेका हुन् ।
नेपाल खाद्य संस्थान कोल्टी प्रमुख भीमबहादुर बुडा र नुन डिपो प्रमुख जयराम रेग्मीसँग छलफल गर्दै खाद्यान्न र नुनको अवस्थाबाारे जानकारी लिए ।
स्थानीयलाई खाद्यान्न र नुनका लागि समस्या नहोस् भनेर दुवै डिपो प्रमुखलार्ई आफ्नो कार्यकक्षमा बोलाई खाद्यान्न पर्याप्त भए नभएकोबारे जानकारी दिँदै अपुग भए चाँडो ढुवानी गर्नुपर्ने बताए ।
बर्खा लागिसकेकाले खाद्यान्न र नुन ढुवानीमा समस्या हुनसक्ने भन्दै उनले अपुग भए तत्काल ढुवानी गर्न निर्देशन दिए ।
सडकको अवस्था राम्रो नभएकाले वर्षातको समयमा ढुवानी गर्न समस्या हुने भन्दै उनले स्थानीयलाई कति आवश्यक पर्छ त्यो समयमै ढुवानी गर्न कर्मचारीलाई आग्रह गरे ।
छलफलका क्रममा खाद्यान्न ढुवानी गर्नुपर्ने भए पनि नुन ढुवानी गर्नुपर्ने अवस्था नरहेको कर्मचारीले बताएका छन् ।
नुन डिपो प्रमुख जयराम रेग्मीले यस वर्ष नौ सय ८० क्विन्टल नुन वितरण हुने अनुमान गरिएको बताए । नौ सय ५७ क्विन्टल डिपोमा मौजाद रहेको र २३ क्विन्टल ढुवानी हुने क्रममा रहेकाले यस वर्षका लागि नुन पर्याप्त हुने उनले जानकारी दिए ।
यस्तै, नेपाल खाद्य संस्थान प्रमुख भीमबहादुर बुढाले कार्यालयमा दुई हजार पाँच सय क्विन्टल चामल मौजाद रहेको बताए ।
अहिले दैनिक सरदर वितरण हुने २० क्विन्टलका दरले महिनामा ६ सय क्विन्टल चामल आवश्यक पर्ने उनले जानकारी दिए ।
यही अनुपातमा चामल बिक्री वितरण भए साउन, भदौ र असोज गरी तीन महिनालाई पुगे पनि कार्तिकका लागि अपुग हुन सक्ने कार्यालय प्रमुख बुढाले बताए ।
कार्यालयमा मौजाद रहेको चामल यस वर्षका लागि पुग्ने अनुमान गरिए पनि दैनिक २० क्विन्टलभन्दा बढी बिक्री वितरण भएको खण्डमा केही भन्न नसकिने उनले बताए ।
गत वर्ष यतिबेला १ हजार क्विन्टल चामल मौजाद रहेको कार्यालयमा अहिले २ हजार ५ सय क्विन्टल मौजाद रहेको कार्यालयले जनाएको छ । कोल्टीका लागि पाँच हजार क्विन्टल चामलको कोटा थपिए पनि मुल्यवृद्धि भएको भन्दै ठेकदारले ढुवानी गर्न नमानेकाले समस्या भएको कार्यालय प्रमुख बुढाले बताए ।
६ महिना खान नपुग्ने बाजुरामा अधिकाशंलाई खाद्यान्नको भर भए पनि समयमा उपलब्ध नहुँदा वर्षेनी दुःख पाउने गरेको स्थानीयले बताए ।
फागुन ३०, २०८०
फागुन २९, २०८०
कात्तिक १४, २०८१
