साउन ०८, २०८०
पर्सा- बढ्दो खानेपानीको समस्यालाई दृष्टिगत गरी वीरगञ्ज महानगरपालिका–१० आदर्शनगरमा आज निःशुल्क खानेपानी मेसिन जडान गरिएको छ ।
ग्रिनसिटी सामुदायिक सेवा केन्द्र तथा ग्रिनसिटी सामुदायिक प्रहरी सेवा केन्द्र आदर्शनगरले जडान गरेको निःशुल्क खानेपानी मेसिनको एक कार्यक्रमका बीच महानगरपालिकाका प्रमुख राजेशमान सिंहले उद्घाटन गरे ।
रुङ्टा वेलफेयर सोसाइटीको आर्थिक सहयोगमा आदर्शनगर चोकमा निःशुल्क खानेपानी मेसिन, पानी ट्याङ्की र मोटर जडान गरिएको हो । महानगरभित्र केही समययता देखिएको खानेपानीको समस्यालाई केही हदसम्म भए पनि स्थानीयलाई राहत पुग्ने महानगर प्रमुख सिंहले बताए ।
प्रतिकूल मौसम र भूजल साविकको सतहभन्दा तल झर्दा वीरगञ्जसहित तराई–मधेसका अधिकांश स्थानमा देखिएको खानेपानीको समस्यालाई समाधान गर्न महानगर लागेको उनको भनाइ छ । आगामी दिनमा वीरगञ्जका अन्य स्थानमा पनि यस्तै निःशुल्क खानेपानी मेसिन जडान गरिने महानगर प्रमुख सिंहले बताए ।
पानीको मुहान सुकेर खानेपानीको अभाव झेल्दै आएका नगरवासीलाई थोरै भए पनि राहत पुगोस् भन्ने उद्देश्यले खानेपानी मेसिन जडान गरिएको ग्रिनसिटी सामुदायिक सेवा केन्द्रका अध्यक्ष जयप्रकाश खेतानले बताए । खानेपानीको समस्यासँग जुधिरहेका नगरवासीका लागि ट्याङ्करबाट खानेपानी वितरण गर्दै आएको जनाउँँदै महानगर प्रमुख सिंहले अत्यावश्यक स्थानमा ट्याङ्की र धारा जडान गर्ने कार्यलाई तीव्रता दिइएको बताए ।
खानेपानी संस्थानको पाइपलाइन विस्तार भएका वडा नं १ देखि १७ र १९ मा धारा जडान गर्नुका साथै पाइपलाइन नपुगेका स्थानमा ट्याङ्कीमार्फत अस्थायीरूपमा पिउने पानीको व्यवस्था मिलाउन सुरु गरिएको उनको भनाइ छ । महानगरले आइतबार वडा नं १ र १५ का सार्वजनिक स्थानमा १० हजार लिटरको ट्याङ्की राखेर पिउने पानीको प्रबन्ध मिलाएको छ ।
यस्तै घरघरमा रहेका चापाकल सुकेर पानीको समस्या भोग्दै आएका वडावासीलाई खानेपानीको व्यवस्था मिलाउन वडा नं २५ का वडाअध्यक्ष आशुतोष चतुर्वेदीले आफ्नो व्यक्तिगत खर्चमा ट्याङ्की जडान गरेका छन् । सबैको प्रयास र हातेमालोबाट मात्रै प्राकृतिक विपत्तिको सामना गर्न सकिने भएकाले वडावासीका लागि आफ्नै लगानीमा १० हजार लिटरको ट्याङ्कीमार्फत ठाउँठाउँमा पानीको प्रबन्ध मिलाएको उनले बताए।
फागुन ३०, २०८०
फागुन २९, २०८०
कात्तिक १४, २०८१
