भदौ २७, २०८१
माघ ०६, २०७७
हुम्ला- कोरोना महामारीले बन्द रहेका हुम्लाको सीमकोट गाउँपालिकाभित्रका विद्यालय आउँदो १५ माघबाट सञ्चालनमा आउने भएका छन् । कार्यपालिकाको शिक्षा समितिको बैठकले विद्यालय सञ्चालन गर्ने निर्णय गरेको हो ।
पालिकामा सामुदायिक २३ र निजी ५ गरी २८ विद्यालय छन् । ती सबै विद्यालयले सामाजिक दूरी कायम गरी स्वास्थ्य सुरक्षा मापदण्डको पालना गरी सञ्चालन गर्ने निर्णय भएको सीमकोट गाउँपालिका निमित्त प्रमुख प्रशासकीय अधिकृत उजिर रोकायाले जानकारी दिए ।
गाउँपालिकाले निजी तथा सामुदायिक ती विद्यालयका लागि स्यानिटाइजर उपलब्ध गराउनेछ भने मास्क भने विद्यार्थीले आफैंले लगाउनुपर्नेछ ।
यसअघि गाउँपालिकाले गत १९ कात्तिकबाट विद्यालय सञ्चालन गरेर एक सातासम्म पठनपाठन गराए पनि उत्तरी नाम्खा गाउँपालिकाको महाबौद्ध माध्यमिक विद्यालय याल्वाङमा अध्ययनरत विद्यार्थीमा कोरोना देखिएपछि बन्द गरिएको थियो ।
जिल्लामाा फागुन पहिलो सातामा नयाँ शैक्षिक सत्र सुरु भई मंसिरमा वार्षिक परीक्षा भएर हिउँदे ३ महिना बिदा हुने गथ्र्यो । विद्यार्थीको पढाइमा बाधा पुगेपछि १५ दिनअघि नै विद्यालय सञ्चालन गरिने भएको उनले जानकारी दिए ।
जिल्लाका अन्य गाउँपालिकाका विद्यालय कोरोना त्रासले बन्द छन् । हुम्लामा हालसम्म ९१ जनामा कोरोना संक्रमण देखिएको छ भने तीमध्ये ९० जना निको भएर घर फिर्ता भइसकेको जिल्ला अस्पतालका सूचना अधिकारी भक्ति फडेराले बताए ।
कात्तिक १४, २०८१
