भदौ २७, २०८१
माघ १७, २०७७
ताप्लेजुङ- ताप्लेजुङको मिक्वाखोला गाउँपालिकाले एकीकृत पाठ्यक्रम (आइईएमआईएस) का आधारमा विद्यार्थीको विवरण अद्यावधिक गर्ने विद्यालयलाई मात्र दिवा खाजाको रकम उपलब्ध गराउने भएको छ ।
गाउँपालिकाको शिक्षा शाखाले विद्यालयको आइईएमआईएसमा विद्यार्थी विवरण अद्यावधिक गरेको लिखित जानकारी र सोबमोजिमको विद्यार्थी विवरण भए मात्र दिवा खाजाको रकम उपलब्ध गराउने भएको हो ।
गाउँपालिकाका शिक्षा अधिकृत प्रवीन राईले आईईएमआईएसमा विद्यार्थी विवरण अद्यावधिक गरी सोहीअनुसार विवरणको दैनिक हाजिरीसमेतका आधारमा मात्र दिवा खाजा रकम उपलब्ध गराइने जानकारी दिए ।
गाउँपालिकाले सर्तअनुसारको प्रक्रिया पूरा गरेका विद्यालयलाई चौमासिक रूपमा दिवा खाजा रकम माग गर्न पालिकाभरिका सबै सामुदायिक विद्यालयलाई आग्रह गरेको छ ।
गाउँपालिकाले कक्षा १ देखि ५ सम्मका विद्यार्थीलाई दैनिक १५ रुपैयाँका दरले दिवा खाजा रकम उपलब्ध गराइने भनेको छ ।
जंक फुड प्रयोग नगर्ने, स्थानीय उत्पादनलाई प्राथमिकता दिने र विद्यार्थीको दैनिक विवरणका आधारमा मात्र दिवा खाजाको रकम उपलब्ध गराउने गाउँ शिक्षा समितिको तयारी छ ।
कात्तिक १४, २०८१
