काठमाडौं- राष्ट्रिय परीक्षा बोर्ड सानोठिमीले माध्यमिक शिक्षा परीक्षा (एसइई) को आन्तरिक मूल्यांकनको नतिजा आउँदो २५ साउनभित्र सार्वजनिक गर्ने भएको छ ।  

२५ साउनभित्र २०७७ को एसइई नतिजा सार्वजनिक गर्ने गरी अहिले काम भइरहेको परीक्षा बोर्ड, परीक्षा नियन्त्रण कार्यालय (कक्षा १०) का परीक्षा नियन्त्रक रुद्र अधिकारीले बताए ।

सबै जिल्लाबाट विद्यार्थीको मूल्यांकन नतिजा आएर इन्ट्री सकेर नम्बर रुजु गर्ने काम भइरहेको बताउँदै उनले कुनै प्राविधिक कठिनाइ नआए आगामी शुक्रबारभित्र विद्यार्थीको नतिजा रुजु गरिसक्ने र त्यसको एक साताभित्र नतिजा सार्वजनिक गरिने जानकारी दिए ।

कार्यालयका अनुसार २०७७ को एसइई परीक्षाका लागि ५ लाख १७ हजार विद्यार्थीले रजिस्ट्रेसन फारम भरेका थिए ।  दोस्रो लहरको कोभिड-१९ संक्रमण बढ्दै गएपछि गरिएको निषेधाज्ञाका कारण गत २७ वैशाखमा एसइई परीक्षा स्थगित भएको थियो ।

गत १३ जेठदेखि भौतिक रूपमा एसइई परीक्षा सञ्चालन गर्ने गरी बोर्डले तालिका सार्वजनिक गरे पनि कोभिडकै कारण परीक्षा हुन नसकेपछि १७ जेठको मन्त्रिपरिषद् बैठकले आन्तरिक मूल्यांकनबाट नतिजा प्रकाशित गर्ने निर्णय गरेको थियो ।  

बोर्डले एसइईको विद्यार्थी मूल्यांकन, नतिजा प्रकाशन तथा प्रमाणीकरण कार्यविधि, २०७८ जारी गर्दै सैद्धान्तिकतर्फ कुनै पनि विषयमा ८० प्रतिशत वा सोभन्दा बढी प्राप्तांक प्राप्त गर्ने विद्यार्थीको विषगत शिक्षकले के कारण उक्त नम्बर दिइएको हो भनेर कारण खुलाउनुपर्ने जनाएको छ ।  कोभिडकै कारणले २०७६ को एसइई परीक्षाको नतिजा पनि आन्तरिक मूल्यांकनबाट प्रकाशित गरिएको थियो ।