हुम्ला– कोरोना महामारीले बन्द रहेका सीमकोट गाउँपालिकाभित्रका सामुदायिक तथा संस्थागत विद्यालय आउँदो २७ बाट सञ्चालनमा आउने भएको छन् ।
बुधबार बसेको सीमकोट गाउँपालिकाको शिक्षा समितिको बैठकले विद्यालय सञ्चालन गर्ने निर्णय गरेको हो ।

पालिकामा सामुदायिक २३ र निजी ५ गरी २८ विद्यालय छन् । सबै विद्यालयले सामाजिक दूरी कायम गरी स्वास्थ्य सुरक्षा मापदण्डको पालना गरेर विद्यालय सञ्चालन गर्ने निर्णय भएको सीमकोट गाउँपालिकाका प्रमुख प्रशासकीय अधिकृत उजिर रोकायाले जानकारी दिए ।

यसअघि गाउँपालिकाले गत वर्षको १९ कात्तिक र १५ माघबाट विद्यालय सञ्चालन गरेर एक सातासम्म पठनपाठन गराए पनि जिल्लामा कोरोना संक्रमण फैलिएपछि पुनः बन्द गरिएको थियो ।

जिल्लास्थित कोभिड–१९ संकट व्यवस्थापन केन्द्रको सोमबार बसेको बैठकले स्वास्थ्य मापदण्ड अपनाएर विद्यालय सञ्चालन गर्न दिने निर्णय गरेपछि सीमकोट पालिकाको शिक्षा समितिको बैठकले २७ भदौको मिति तोकेको हो ।

गत सोमबार डिसिसिएमसीले जिल्लाका ७ वटै पालिकाले संक्रमणको अवस्था हेरेर विद्यालय सञ्चालन गर्न पाउने निर्णय गरेको थियो । जिल्लामा फागुन पहिलो साता नयाँ शैक्षिक सत्र सुरु भई मंसिरमा वार्षिक परीक्षा भएर तीन महिना हिउँदे बिदा हुने गथ्र्यो । तर, यो वर्ष असारमा नयाँ शैक्षिक सत्र सुरु भएको छ । कोरोना संक्रमणले हुम्लाको शिक्षा क्षेत्र थिलथिलो बनेको छ ।